Izaci ngempumelelo

Ukuhlaba ukhangele: Ukwenza into ulumnkile ukuba iziphumo zayo zingakujikeli kakubi.
Ukwenza izinto zamehlo: Ukugqwesa entweni.
Kukud’ engqinibeni: Akukho lula ukufikelela empumelelweni. Akululanga ukufikelela kwindawo ekunqwelwa ukufikwa kuyo. Umntu ekungalulanga ukufikelela apho kumelwe abe selefikelele khona.
Ukuphuma izandla: Ukugqwesa uvelele kwabanye ekwenzeni loo nto yenziwayo.
Ukuqongqotha ithambo: Ukwenza into ngempumelelo.
Ukuba sisikhokho: Ukugqwesa.
Kosengwa ikati: Kuyakwenziwa unakonako wokuphumelela phantsi kweemeko zokuswela.
Laza latol’ iLawu: Waze wayichana into ebenganalwazi ngayo ngaphambili. Le ntetho ibhekiswa kumntu odlisela ngokuchana into phofu efudula ephosa.
Ukuqhumza iqanda: Ukuphumelela emva kwexesha elide uzama.
Ukukhanda umongo: Ukwenza into ngempumelelo. Ukufikelela esiphelweni sento.
Ntinga ntakandini: Qhubekeka uphumelela.
Intambanane endand’ emafini: Umntu ogqwesileyo.
Ukutshila kwentambanane: Ukwenza into ebukelekayo.
Ukuba yingwenya: Ukugqwesa.
Impumelelo isentabeni: Kuyanyanyezelwa ukuze kufumaneke impumelelo.
Kumhla kwahluzwa: Kude kwakho impumelelo.
Ukutshotsh’ entla: Ukugqwesa.
Kukud’ eLatakisa: Akukufutshananga empumelelweni kwaye akuthembisi ukuba kwakufikwa kwangoko.
Ubude abuphangwa: Impumelelo ayifiki ngexesha elinye. Kuthatha ithuba ukufika empumelelweni.