Izaci ngokuncedana

Ukuchebana iinduma: Ukuncedisana.
Ukuhlaba ikhwelo: Ukumema abantu kwinto ekumele yenziwe kuncediswane ngayo.
Ukuhlaba umkhosi: Ukukhwaza ucela uncedo.
Ukuphos’ igada: Ukuncedisa kuloo nto yenziwayo. Ukongeza amazwi kuloo nto ithethwayo. Umzekelo: Ndithi nam makhe ndiphos’ igade kulo mba usetafileni.
Ukuqhwayana umqolo: Ukuncedana.
Ukugqumana umqolo: Ukuxhasana entweni.
Ukugqumana umhlana: Ukuxhasana entweni.
Ukufak’ igxalaba: Ukuncedisa.
Izandla ziyosulana: Kuyancedwana ngabantu.
Ukupha isandla: Ukunceda.
Ukolula isandla: Ukunceda.
Ukufaka isandla: Ukuncedisa entweni.
Ukucela izandla: Ukucela uncedo. Ukucela inkxaso.
Izandla ziyahlambana: Kuyancedwana ngabantu.
Isandla sihlamb’ esinye: Abantu bayancedana.
Ukubambana ngezandla: Ukuvana nokuncendisana entweni.
Ukwenziwa umntu: Ukuncedwa kwinto ekuphumelelisayo ebomini. Umzekelo: Kwekhu, undenze umntu ke khona Monyuli, besendingasazi ukuba mandidibanise ntoni nantoni ze ndiphumelele kule ngxaki.
Usenga ekhabayo: Ukufuna into kumntu ozakuba nentetho eninzi ngaphambi kokuba akuncede.
Ukuphosa ilitye esivivaneni: Ukongeza ukuncedisa koko sekukho.