- Iphela lingen’ emasini: Kukonakalisa into entle.
- Inkunzi bayinqumle iimpondo: Bamthibazile umntu obeyinkathazo.
- Ukukhanyela kumil’ ingc’ emqolo: Ukungavumi tyala nokuba sewutshutshiswa kangakanani.
Umzekelo: Ube ngavelwa ngapha nangapha ngemibuzo malunga nesenzo sakhe, wakhanyela kwamil’ ingc’ emqolo.
- Ukukhanyela ude ulale ngomqolo: Ukuphika into ungazimiseli kuphinda ujike kuloo nto uyithethayo.
- Ingalo yomthetho inde: Umthetho uthatha ithuba lawo ukuqoshelisa imicimbi yawo kangangokuba umtyholwa angade acinge ukuba ityala licinyiwe. Njengokuba usophula umthetho nje uyakuze ufumaneke ngeny’ imini.