- Ukunyela ngamathe: Ukwenza into engekho mgangathweni.
- Ingxowa yamanzi: Ivila.
- Ukuqinis’ umqolo: Ukuzimisela ngakumbi kwinto oyenzayo.
- Ukuba neminwe: Ukuba nobuchule bokwenza izinto ngezandla.
- Ukubhinqela phezulu: Ukwenza into ngokukhuthala nokuzimisela.
- Ukuba nesandla: Ukuphatha kakuhle into. Ukugcina into oyiphathisiweyo ngendlela ekholisa lowo ukugcinise yona.
- Ukuma ngeenzwane: Ukuxakeka.
- Ukunyusa iikawusi: Ukuzimisela ngakumbi ekwenzeni into.
- Ukuqhunyiselwa ngothuli: Ukushiywa entweni ungabandakanywa.
- Ukubamba umzimba: Ukungazinikeli ngokukhululekileyo kuloo nto uyenzayo.
- Ukulala emqokozweni: Ukuyekelela ukwenza into ngelithi iyakwenziwa ngabo ukunye nabo. Ukungazimiseli ekwenzeni into ekumel’ ukuba uyayenza. Umzekelo: Hayini madoda sanukulala emqokozweni, ngowethu sonke lo msebenzi. Kungani ukuba nisiyekelele.
- Ukuqwela ingqokoqho: Ukugqibezela into ebisenziwa.
- Ukwenza indima: Ukuba negalelo elibonakalayo ekwenzeni into.
- Ukulima entsindeni: Ukwenza into ezakuba nembuyekezo enkulu. Intsinde lithafa ebekukade kungalinywa kulo, maxa wambi ke ibiba yintsimi esel’ ineminyaka ingalinywa. Bekuthi ke ukuba kuthe kwalinywa kuyo emva kwelo xe isuke ithwale izityalo ngokungummangaliso.
- Ukuzixhomela iintanyongo: Ukuba noqoqosho ugcine into onazo ulungiselela zikuncede kwixa elizayo.
- Ukumfimfitha amakhambi: Ukucokisa ekwenzeni into.
- Ukuzeka mzekweni: Ukwenza into eyenziwayo.
- Ukuba liLawu: Ukwenza inkcitho ngokungakhathali.
- Kwavula zibhuqe: Apho ubani enza nantoni na eqale yafika engqondweni.
- Iwazala iwaqandula: Umntu ongakhe enze into egqibekayo. Uthi engekayigqibi le atsibele kwenye nayo angayigqibi enze enye. Le ntetho isuka kwimeko yesikhukhukazi esithi xa sigqiba kubeka iqanda siphinde kwasona siwaqhumze ngomlomo wayo.
- Ukukhupha nasemsileni: Ukwenza ngakumbi kunoko wenza ngako. Kukho intsomi yokuba udyakalashe wayedlisela ngokuba namaqhinga kwakhe. Uthi xa sekunzima yena ukhupha asemsileni amaqhinga. Uthe esabalisela inkawu ngendlela anamaqhinga ngayo suka kwathi gqi umhlambi wesinja. Yeka ke udyakalashe ukusombela isinqe esindisa ubomi bakhe. Nezinja ezazimleqa zazinamendu amangalisayo kangangokuba zasezimfuthanisele udyakalashe. Zithe xa sezizakumbamba yakhwaza inkawu yathi, ‘Khupha nasemsileni!’
- Ukubhenq’ umsila: Ukuzinikela ngakumbi kwinto oyenzayo.
- Amanga ashiyw’ emzini: Sukwenza into kwindawo ongafanelanga kuyenza kuyo.
- Ukubuyel’ enkomeni: Ukuqhubekeka ngento ebisenziwa emva kokuphumla ithutyana.
- Yeyele ngomkhono: Unomsebenzi omkhulu nonzima odinga ukuba ancediswe ukuze awuqabelise.
- Yalal’ inkom’ isengwa: Ukwenza into engaqhelekanga nengamkelekanga.
- Ukusengela esekweni: Ukwenza inkcitho.
- Ukungen’ edyokhweni: Ukwenza into ekulindeleke ukuba uyayenza.
- Kubethw’ etsalayo: Izinto zibuzwa kumntu onenkathalo. Kuthunywa umntu okhutheleyo.
- Ukuncela umbele: Ukwenza into ngenzondelelo de uyifeze.
- Ukwenza amabal’ engwe: Ukugqagqanisa.
- Ukuthezela egoqweni: Ukukhawulezisa ukwenza into.
- Ukugawulela egoqweni: Ukukhawulezisa ukwenza into.
- Ukutyhila emfeneni: Ukwenza into ngokuthe chatha kunoko ubusenza njalo kuqala.
- Liyagaya liyacola eli litye: Umntu onobuchule bokwenza izinto ezahlukileyo, ukucokisisa ukwenza into. Le ntetho isusela kwilitye lokusila, xa usila uyakwazi ukwenza umgrayo njengaxa ugraya (gaya) umbona usenzela ukupha amantshontsho enkuku. Kanti kwakhona kwangeli litye uyakwazi ukucola njengaxa ucola kwalo mbona uzakwenza umkhupha okanye umgubo wombona.
- Zibenza zibutya: Umntu osebenzileyo ethubeni uxhamla iziqhamo zemisebenzi yakhe.
- Ukukhetha impukane emasini: Ukwenza into ngononophelo.
- Ukuthezela emnxebeni: Ukukhawulezisa ukwenza into.
- Ukuhesha iimpukane: Ukususa iziphazamisi eziquqa zibuyelela kwizinto ozenzayo.
- Abathumani manzi: Akekho owodlula omnye ngokukhuthala.
- Ukumka namanzi: Ukuphulukana nento elixabiso, phofu uyibona ukuba uyaphulukana nayo.
- Zisina zidedelana: Nika abany’ abantu ithuba lokwenza le nto yenziwayo.
- Ukugawula uwarhuqa: Ukukhawulezisa ukwenza into.
- Ukwenza amatshe: Ukukhawuleza ekwenzeni into.
- Ukuphosa intambo: Unikela uxanduva komnye umntu.
- Ukubamba iintambo: Ukungayekeleli kuloo nto uyiphathisiweyo.
- Inqokronqokro: Umntu ozimsele ukwenza into kwaye enolwazi oluphangaleleyo kuloo nto.
- Ukuyekelela umxakatho/ixakatho: Ukwetha amandla ekwenzeni into.
- Ukuphosa umkhonto: Ukunikela ngento esisipho okanye inkxaso kuloo mcimbi wenziwayo.
- Ukuwa uvuka: Ukwenza iinzame zokufumana into oyidingayo.
- Ukuba maxhaphetshu: Ukuququzela usenza into ofuna ikhawuleze yenzeke.
- Umalawula elawulwa: Umntu ophikisana nokuphathwa.
- Ukuhlafuna uvungula: Ukwenza okanye ukuthetha izinto ezahlukeneyo ngaxeshanye.
- Umfundisi ulindwa ngeculo: Umntu ofika mva emcimbini ufika kuqhutywa ngabo bafike ngethuba.
- Ukuhlabela mgama: Ukudlulela phambili.
- Ukuyihla amahlongwane (phezulu): Ukuyiphonononga okanye ukuyicubungula into.
- Akukho mntu unesiphatho somnye: Umntu ngamnye uneendlela zakhe nobuchule bakhe ekwenzeni izinto.
- Isikhokho: Umntu ogqwesayo ekwenzeni izinto.
- Ingwenya: Ungumntu ogqwesayo ekwenzeni izinto.
Izaci ngokusebenza
ℹ️ Ulwazi oluvela kuluntu · Funda isilumkiso