Skip to content
- Ukufihl’ intloko: Ukungazicacisi ukuba ukweliphi na icala emcimbini oxoxwayo okanye owenziwayo.
- Ukubetha entloko: Kutsho umntu owehlelwe yinto ebengalindelanga ukuba ingehla. Ukukhohlisa.
- Ukugqebh’ iduma: Ukukhohlisa umntu ukuba akwenzele into uthembise ngokumbuyekeza ngezakho izenzo ze ungazifezekisi, loo mntu umgqebh’ iduma.
- Ukugqebha elingophiyo: Ukukhohlisa umntu ukuba akwenzele into uthembise ngokumbuyekeza ngezakho izenzo ze ungazifezekisi, loo mntu umgqebhe elingophiyo.
- Umbethe elingophiyo (iduma): Ukwenza into embi komnye umntu. Umzekelo: Inene undibethe elingophiyo uNgxaki. Bendiba ndiyakumfundisa ade ayityekeze kodwa naku ngoku ekhetha ukubaleka isikolo esesenyeleni.
- Ukuhleka intsinimenyo: Ukuhleka ungahleki. Ukukhohlisa ngokungathi uyayithanda into eyenziwa ngomny’ umntu ube ngaphakathi ungathethi lonto.
- Ukulum’ uvuthela: Ukukhohlisa.
- Ubhodl’ esambesa: Ngumntu onga uyakunceda kanti ujonge inzuzo ngokukuqhatha.
- Yintlolela yombini: Umntu othutha iindaba zeli cala azise kweliya ze athatha ezelaa cala azizise kweli. Oko kukuthi uyintlola yala macala omabini.
- Ukubethisa ngoyaba: Ukungakhathaleli into eyenzekayo ubengathi awuyiboni okanye awuyiva. Umzekelo: Ndithe ndimbuza ukuba uyifumene phi imali yokuthenga impahla entsha engasebenzi, waske wawubethisa ngoyaba umbuzo wam, wavusa eny’ incoko.
- Ukudla usosula (umlomo): Ukwenza into ze wenze ngathi awukhange uyenze. Kubhekiswa kumntu ongoneliyo yinto ayiphiwayo, akhanyele ukuba ebekhe wenzelwa into nguloo mntu.
- Ukudlela indlolothi: Ukukhohlisa.
- Ukuhla ngomlenze: Ukunyamalala kwento ngendlela engaqondakaliyo nengachazekiyo ukuba yenzeke njani. Umzekelo: Ngokuqinisekileyo le mali yenkxaso ihle ngomlenze. Abakwazi kungayazi ukuba iyephi babe abantu abamele kuyixhamla bengayifumananga.
- Ukuba nebatha: Ukwenza izinto ezingaqondakaliyo nezingahambelaniyo noko kulindelweyo.
- Ukuqhola ngothuli: Ukukhohlisa.
- Ukulaliswa nerhanisi: Ukukhohliswa ngokwenzelwa ububele kanti kujongwe ukukwenzakalisa okanye ukufaka emgibeni weyelenqe.
- Ukusengela ezintsinini: Ukukhohlisa.
- Uwiswe lihashe lakhe: Uphoxwe ngumntu ebemthembile.
- Ukunika imbila ngentloko: Ukukhohlisa.
- Ukubambisa umoya: Ukukhohlisa.
- Umoya wesibaya: Iwexu-wexu.
- Ukubambisa iliwa: Ukukhohlisa. Ukuthembisa ilize.
- Ukuba yinyoka: Ukukhohlisa.
- Ukoja umnga: Ukuqhatha. Ukukhohlisa.
- Ukhaka kampethu: Iwexu-wexu.
- Ukukhab’ ezantsi: Ukukhohlisa. Ukuqhatha.
- Ukuzifihla eqokobheni: Ukungafuni kucaca isimo sakho.
- Ukuhamba nomsinga: Ukuya kwelo cala kuyiwa kulo, ngakumbi xa kuxoxwa.
- Ukuhla nomcinga: Ukurhoxa kwisigqibo obusenzile. Umzekelo: Ndiyazi ukuba bendithembise ukukumela kweli tyala lakho, kodwa ke ndiyaxolisa kuba ndibon’ ukuba mandehle nomcinga ngokunyanzelwa ziimeko ezingaphaya kwamandla am.
- Ukuhlala emcingeni: Ukungabinacala engxoxweni, uvume nabavumayo, ulandule nabalandulayo.
- Andisatshayi ngaloo nqawa: Andisangeni kuloo ngxoxo bendizibandakanye kuyo. Ndidlule kuloo ngxabano yethu. Andisangeni kweso sithembiso bendisenze nawe.
- Ukuba yiMpukuntaka: Ukuba liwexuwexu. Impukuntaka lilulwane.
- Ukuba yingcongolo: Ukuvumela loo nto ithethwayo nokuba ichasene nale ubuyivumile kuqala.
- Ukudlala undize: Ukungabambeki.
- Ukuthath’ ubeka: Ukungaqiniseki ngeyona nto mawuyenze.
- Unam-nawe: Into engenamntu ufuna ukuthi uyenzile, ingulowo usuka angayazi.
- Ukuba nguthathekile: Ukulandela wenze nayiphi na into odibana nayo phofu ingeyiyo imeko yentlalo yakho.
- Ukulalis’ uboya: Ukwenza ngathi uyamnceda umntu ube ujonge ukumqhatha.
- Ukukhwel’ ecingweni: Ukungabi nacala xa kuxoxwa into, uvume nabavumayo, ulandule nabalandulayo.
Related
