- Kuf’ ayayo: Ilizwi lenkuthazo. Zimisele ukuyenza into xa uyibona izakuphumelelisa, nakubeni kubonakala ngathi awuzukuphumelela ngeli xesha ungekayiqali.
- Kusa kusihlwa: Musa ukulindela izinto ezintle zodwa ebomini, ngamany’ amaxesha akubi mnandi.
- Alitshoni lingaphumi: Iingxaki okuzo zizakudlula kubuye kukhanye.
- Akukho ndlela mbini: Qubisana nomceli mngeni ngalo mzuzu azibonakalisa ngawo, Alikho elinye icebo elinokuvela ukuqubisana nemeko akuyo umntu ngelo xesha ngaphandle kokuba ayilungise ngolu hlobo seyizibonakalisa ngalo.
- Ukuntyontyela amakhwelo: Ukukhuthaza.
- Izinto azimntakaNgqika: Izinto azifani nangaphambili.
- Umzingisi akanashwa: Umntu onyamezelayo ekwenzeni into ude aphumelele.
- Ukuwubhinqa ubemfutshane: Ukuzilungiselela kwinto ozakuyenza ukuze uyiphumelele. Umzekelo: Ndiwubhinqe wamfutshane ndifunda imini nobusuku ukuze ndiphumelele ezifundweni zam ukuphela konyaka.
- Nyusa iikawusi: Yenza ngaphezu kokuba usenza.
- Ukuqula uligangathe: Ukuzilungiselela kangangoko kuvavanyo oluzayo ozakuqubisana nalo. Umzekelo: Mazithi zifikile nje ezi mviwo zokuphela konyaka, ndiqule ndaligangatha.Iqulo lilaphi, nokuba sisikhafu okanye isikipa, esisetyenziswa ngumntu ozakudlala iintonga. Ulibhijela ukudibanisa isandla nentonga yokukhohla. Kwenzelwa ukuba nokuba ubethwa yintonga yalo udlala naye ingakwazi ukufikelela esandleni ikungqube, koko ibethe kweli qulo. Ukuqinisekisa ukuba liqinile kwaye awuzukuva ntlungu xa ubethwa yiloo ntonga xa uvika, uzakube ulibetha ngale ntonga yakho yokugalela. Oko ke kukuligangatha.
- Kukufutshan’ ebhantini: Sele uzakuyingcamla impumelelo. Kumdlalo weembaleki, ibhanti yilaa ntambo ibekwa ekugqibeleni kwibala lokubaleka apho imbaleki ephume phambili ibeyiyo ezakuqale ibambe okanye igile elo bhanti.
Izaci ngokukhuthaza
ℹ️ Ulwazi oluvela kuluntu · Funda isilumkiso