Izaci ngokufa

Ukufa kusemlenzeni: Ukufa sihamba nako, ngoko umntu angabhubha nanini na.
Ulele kobandayo: Kutshiwo kumntu obhubhileyo.
Isitya esihle asidleli: Umntu onemisebenzi emihle akaphili ixesha elide.
Lahlanz’ iselwa: Ukufa ngesiquphe. Le ntetho idla ngokusetyenziswa xa lowo uswelekileyo esweleke ngenxa yokuhlaselwa ngesikhali ze ophe ade abhubhe. Umzekelo: Kugaleleke imigewu emine yatsho ngothotho lweembumbulu kuMlulami lahlanz’ iselwa kwangoko.
Itshoba lilel’ umbethe: Ubhubhile.
Ingqanga ifile: Kuhambe umntu obengusaziwayo. Ukuhlupheka komntu obekade efumile enezinto zakhe.
Ukunabela uqaqaqa: Ukubhubha.
Ukunabela ingca: Ukubhubha.
Ukwambatha uqaqaqa: Ukubhubha.
Lwangcol’ ungele: Ukufa ngesiquphe, ngakumbi ngengozi.
Ukuya kooyisemkhulu: Ukubhubha.
Kwantsongwa nyawana: Engcwabeni.
Elokufa alidleli: Akukho mntu unolwazi ukuba uyakubhubha nini na.
Ukuhlelwa lilifu elimnyama: Ukubhujelwa.
Ukufa luhlaza: Ukufa ngendlela emasikizi.
Ukubek’ inqawa: Ukubhubha.
Kuwe umthi omkhulu: Kusweleke umntu obeyintsika yosapho.
Kugawulwa owaziwayo: Ukufa kufumana abantu abanegalelo ezimpilweni zabany’ abantu kwaye bedume ngezenzo zabo ezintle nezamkelekileyo eluntwini.
Ukukhab’ ibhekile: Ukusweleka.