Izaci ngenqala nezisongelo

Uyakutyaphaka amehlo: Le ntetho ithethwa ukulumkisa umntu ukuba angajongi into angamelwanga kuyibona.
Uyakuzibona: Uyakufumaneka ngale nto uyenzayo.
Uyakuzibuka esipilini: Uyakufumaneka ngale nto uyenzayo.
Ukumunca iintupha: Ukufunga ukuba loo nto izakwenzeka nokuba iimeko zithini. Ukuzimisela ekwenzeni into nokuba iimeko zithini na.
Ndakuyicel’ ivuthiwe: Ndakuyibona xa iphumelele.
Uyakuhamba ngoyibonayo: Le ntetho ibhekiswa kumntu ongalungisekiyo xa eboniswa koko aphikelele ukufuna ukwenza ngale ndlela afuna ukwenza ngayo.
Awuzukukhotha naphantsi: Awuzukufumana kwanto kuloo nto yabiwayo.
Ukungakhothi naphantsi: Ukungafumani nto kuloo nto inikezelwayo okanye kohlulelwana ngayo.
Nokuba kumnyam’ entla: Nokuba iimeko zithini na. Le ntetho ithethwa ngumntu oqinisekileyo ukuba akukhonto iyakumthintela ekwenzeni loo nto aceba ukuyenza. Umzekelo: Kanti ke ndizakuziphumelela izifundo zam kulo nyaka nokuba kumnyam’ entla.
Lijonge uligqibelise: Ndizakukubulala.
Ndiyakubonis’ amaqhekez’ engqele: Ndiyakumenza ahlawule ngesenzo sakhe esibi andenze sona.
Uyakuvuna into oyilimileyo: Uyakuzuza iziqhamo zento oyenzayo, nokuba ziziphumo ezihle okanye ezimbi.
Kwakusa kuhanjwa: Asizukuyeka ukuyilandelela singaziphindezelanga.