Kwasukasukela, kwakukhona izilwane zifuna ukubeka inkosi yazo. Izilwane zonke zanquma umhlangano, emhlanganweni kwathiwa ozobekwa abe iNkosi kumele aqede isaka likapelepele angasho ukuthi, “hl hl hl.” Nangempela yaqala impungushe yaluma owodwa yathi, “hl hl” kwathiwa phuma. Kwalandela indlovu yaluma yathi, “hl hl” kwathiwa phuma. Zalandela zonke izilwane zonke zathi, “hl hl” zabuyiselwa eceleni.
Kwabizwa unogwaja, waluma wathi, “hawu nawe mpungushe ulokhu uthi hl hl umnandi kabi lopelepele.” Waqhubeka wadla unogwaja wathi, “nawe ndlovu ngikwethembile ulingisela umpungushe uthi, hl hl” Aqhubeke unogwaja, “nawe chakide ulokhu uthi hl hl.” Aqhubeke, ayoliqeda isaka unogwaja, eklolodele ezinye izilwane, “bukani mina ngiyaliqeda isaka manje angikasho ukuthi, hl hl.” Wabekwa waba iNkosi unogwaja ngokuhlakanipha kwakhe.
Cosu cosu yaphela.