Kwasukasukela, kwathi ngelinye ilanga ugogo ezihambela eya ehlathini wahlangana nabafana abathathu abangagqokile. Wahamba nabo ugogo waya nabo endlini wafika wabanika izinto zokugqoka. Wathi ugogo, “Obani obani amagama enu bantabami?” Baphendula abafana, “uNgembazo, uSobathathu kanye noNgabangcono.” Wathi ugogo, “Ngembazo ngicela uyothenga isinkwa ubuye sizodla”, ahambe uNgembazo afike esitolo acele ukuthenga. Odayisayo abuze ukuthi uthengani, engakhulumi athi, “Hamba la ngoba awazi ukuthi uzothengani!” Ahambe abuyele emumva afike atshele ugogo ukuthi bamxoshile esitolo. Ugogo akhethe ukuthuma uSobathathu. Ahambe uSobathathu afike esitolo athi ucela ukuthenga. Odayisayo abuze ukuthi uthengani, engakhulumi athi, “Hamba la ngoba awazi ukuthi uzothengani!”
Ahambe abuyele ekhaya uSobathathu, engasiphethe isinkwa athunywe sona. Ugogo athume umfana wesithathu uNgabangcono, ahambe afike esitolo athi ucela ukuthenga. Odayisayo abuze ukuthi uthengani, engakhulumi athi, “Hamba la ngoba awazi ukuthi uzothengani!” Ahambe abuyele emuva engasiphethe isinkwa. Acasuke manje ugogo, “Ngabangcono iphi into engikuthume yona?” athi uNgabangcono, “Bangixoshile esitolo gogo.”
Akhethe ukuhamba nabo bonke ugogo eyozwa ukuthi baxoshelwani. Mabehamba endleleni behlangane nomuntu ofile, bame eduze kwakhe bebuke. Besamile kuqhamuke amaphoyisa athi, “Yeyi nina bafana nimbulale ngani lomuntu?” athi uNgembazo, “Ngembazo ngembazo.” Ethuke amaphoyisa athi, “Ngembazo pho!” Amfake evening. Abuze futhi athi, “Nimbulale ngani lomuntu?” Athi uSobathathu, “Sobathathu sobathathu.” Athi amaphoyisa, “Nimbulale nobathathu, hhayi kungaba ngcono niboshwe.” Avele asholo phezulu uNgabangcono athi, “Ngabangcono ngabangcono.” Abathatha bobathathu abafana ayobabopha amaphoyisa.
Cosu cosu yaphela.