Kwasukasukela, kwakukhona indoda eyabe ifuna umsebenzi, yase ihambe kakhulu iwufuna kodwa ingawutholi. Kuthe ngolunye usuku yawuthola komunye umlungu, yaqashwa yasebenza ngaso leso sikhathi. Wase ethi umlungu uzomuholela inyoni ngoba imali owukheshi akanayo. Umlungu wathi le nyoni inezimanga, izomenzela yonke into ayifisayo.
Ayike yanikwa inyoni indoda, umlungu wathi, “Ndoda, hamba uye ekhaya ungedluli ndawo.” Nebala yahamba indoda ilibangise ekhaya ukuze inyoni izofike yenze izimanga. Isihambe ibanga elide indoda endleleni yafikelwa ukomela amanzi, yakhetha ukwedlula emzini thizeni yafica isalukazi. Yafike yabingelela, mayiqeda yacela amanzi. Isalukazi sabona inyoni yezimanga sabe sesilandula isalukazi sathi, “Akukho ngisho isichibo ndodana, ngicela uyongingela emfuleni, anginabani lapha.”
Yase ithi indoda, “Ngicela ungigadele inyoni yami, ungalinge ucele lutho kuyo.” Yaphuma indoda ilibangise emfuleni. Yathi nje ingasithela sasala sikhuluma nenyoni isalukazi sathi , “Nyoni ngisacela ungiphe amasi.” Yawakhipha amasi inyoni, sadla sashaya esentwala isalukazi saze sashiyela nabazukulu baso. Sathi singasutha sabe sesiqhubeka nokucela, “Nyoni, Nyoni ngicela imali.” Inyoni yakhipha inqwaba yemali. Sayithatha sayibeka ethala imali isalukazi indoda ingakabuyi emfuleni. Yathi ibuya indoda isalukazi sasimsulwa singakhombisi nhlobo ukuthi kade sisebenzisa inyoni.
Sabonga umusa wendoda isalukazi ngokusikhela amanzi. Yavalelisa indoda, yaqhubeka nohambo oluya emzini wayo. Wajabula unkosikazi wabala zonke izidingo zasekhaya ezidingekayo. Indoda ngokuzethemba nangelikhulu iqholo yathi, “Khululeka nkosikazi konke okudingayo uzokuthola.”
Indoda yathi iyacela enyonini, inyoni yazinyela uthuvi bayo obumhlompe. Yaphindaphinda kaningi, lutho inyoni ukunya izinto ezinhle. Ngokuthukuthela indoda yabuyela kumlungu yamtshela ukuthi inyoni ayenzi njengesethembiso. Umlungu wayekwazi ukukhuluma nenyoni wayibuza, “Nyoni yami, kungani ungiphoxa kusisebenzi sami?” Yaphendula inyoni, “Nginye amasi kanye nemali esalukazini.”
Indoda ayipholisanga maseko, yaphuma inyoni iqeda nje ukuphimisa elesalukazi. Yafika isalukazi sesithuthile, kukhala ibhungane. Yakhala yazithulisa indoda isisebenze yangawujabulela umvuzo ngenxa yokomela amanzi.
Cosu cosu yaphela.