Kwasukasukela, kwakukhona ichwane leNyoka. Laphuma lihuhuluza ngesisu njenge njwayelo ichwane lenyoka emgodini walo ukuze liyodlala, zahlakazeka zonke izilwane. Inyoni yandiza yayohlala egatsheni eliphezulu esihlahleni. Amagundane ahlakazeka. Ichwane lengungumbane nalo alibanga lisabuza mkhuhlane latshopela emgodini walo ngokushesha.
“Mama kungani ezinye izilwane zingangithandi?” kubuza ichwane lenyoka. “Njalo uma ngiphumela phandle zibaleka zishiye isithunzi, azilindi nokuthi sibingelelane.” “Izilwane zezwa izindaba ezimbi ngezinyoka. Zicabanga ukuthi ungahle uzenzakalise. Ziyasesaba,” kusho umama wechwane lenyoka. Ichwane lenyoka lalikwazi ukubona ezinye izilwane uma licashile kuphela, lingabonakali. Laliciba ngemuva kwamadwala ukuze lingabonakali. Ngemuva kokufisa ukuba kanye nazo lathi, “Zibukeka sengathi zijabule kakhulu,” lisho ngezwi elinosizi. Ichwane lenyoka lanquma ukusondela eduze.
Lisondela ngoba libona izilwane zigcona ichwane lengungumbane. “Yekani ukungigcona, ngishiyeni ngizidlalele ngedwa,” kusho ichwane lengungumbane. Ichwane lenyoka lasondela ngokushesha ngemuva kokubona ukuthi izilwane aziyeki ukugcona ingingumbane. Zathi zingabona ichwane lenyoka zavele zacela empunzini zonke, kwasala iphunga lazo kuphela. “Ngiyabonga kakhulu,” kusho ingungumbane. “Kulungile mfoka ngungumbane,” kunanela ichwane lenyoka. “Kuzomele njalo uhlale nami ukuze ezinye izilwane zingazophinde zikugcone futhi!” Inyoka yatshela ingungumbane ukuthi kumele bezwane ngoba futhi bahlala emigodini bobabili. Ingungumbane yabe isiyavuma ukuthi inyoka ibe umakhalwane wayo. Namuhla kalokhu lezi zilwane zihlala emigodini engomakhelwane.
Cosu cosu yaphela.