Kwasukasukela, kwakukhona indawo eyayinehlathi elesabeka kakhulu. Lelihlathi lalaziwa ukuthi ligcwele amabhubesi, izingwe kanye nezinye izilwane ezinobungozi. Ibhubesi yayingcono kakhulu impilo yalo ngoba lalibaleka ligibele emthini. Kwakuyisono nengwe, yayingakwazi ukukhetha ukugibela emthini ngoba iyakwazi ukucaca emthini. Kwakukhona ingwe eyayihlala eduze kulendawo. Ingwe yatshela umndeni wayo ukuthi inesifiso sokuvakashela umhlobo wayo ohlala ngemuva kwentaba. Ingwe yayinemithwalo eminingi okwakumele iyiphathe, yacela umfana wakwamakhelwane ukuthi ayiphathise. Yavalelisa emndenini wayo, bahamba benyuka intaba nomfana baze bafika phezulu. Ngemuva kokuba befikele phezulu umfana wabe esekuphethile lokhu ayecelelwe khona. Waphindela emuva umfana, yabe isingena ehlathini ingwe, yabonga ngosizo lomfana.
Yabe isithwala imithwalo iqhubeka yodwa yangena ehlathini. Yayingenalo ngisho oluncane uvalo futhi ingacabangi lutho olubi. Yathi isahamba kanjalo yezwa amahlahla enyakaza. Yavele yathi dlengelele! Yama. Ngemuva kokunyakaza kwamahlahla kwaphuma inja empofu yeqa indlela yangena kwamanye amahlahla angaphesheya. Ingwe yaqhubeka nohambo, yahamba yaze yafika kubahlobo bayo. Izihlobo zayo zajabula ukumbona ngoba zazingalethembi ihlathi ayezohamba kulo ukuze afike kuzo. Wazibingelela bayibuza ukuthi ihambe kahle endleleni, ayiphazanyiswanga lutho endleleni.
Yancoma uhambo lwayo olube luhle yathi, “Ngihambe kahle, angiphazanyiswanga lutho ngaphandle nje kwenja engiyibone ehlathini.” Abahlobo bayo babuza ukuthi ibinjani inja eyibone emahlathini. Bebemangele ukuthi hlobo luni lwenja elubonile ngoba azikho izinja ezihlala ehlathini. Ingwe yabachazela ngesimo salenja eyibonile ukuthi ibinjani. Bavele bamangala bonke bathi, “Bekulubhubesi lelo, kusho ukuthi belisuthi, yikho lingakudlanga.” Bekhohlwe indaba yohambo bexoxe kubemnandi kwazise kade bagcinana.
Bathi besahleli nje kumnandi kwafika isigijimi sizobika ukuthi umfana ebemphelezile akabuyanga, udliwe ibhubesi. Kwavele kwamcacela ukuthi lomfana ube umhlatshelo wokuthi yena engadliwa. Ingwe yahlala ezihlotsheni yangaphinde yabuyela ekhaya. Phela yayesaba umphakathi ukuthi uzoyibhoca ngamatshe ngoba wawuthi unikele umfana ebhubesini.
Cosu cosu yaphela.