Inkomo iyaye ihlatshwe uma kwenziwa umsebenzi noma umnumzane emema umphakathi ukuthi uzobusa nje ekhaya kungonakele lutho. Kudliwe inyama kuphuzwe, kufinywe ngendololwane.
Emandulo umnumzane wayehlaba inkabi noma inkunzi ukuze asike isihlangu/ihawu. Okhokho babekholelwa ekutheni inkomo ehlatshelwa ukusika ihawu nje kuphela yayikhipha ihawu elihle. Isikhumba senkomo sasibekwa ngokucophelela ngoba kwakwaziwa inhloso yaso. Sasivikelwa ezilwaneni njengezinja ukuthi zingasidli.
- Ububende noma Icobe – Ububende ukudla okwakhiwa yingxube yegazi lenkomo kanye nezicubu ezithile zenkomo. Cofa igama ububende ukuthola iresiphi yokupheka ububende.
- Umkhusu – Umkhusu/umqwayiba inyama esikwa enkomeni iluhlaza ifakwe iswayi bese iphanyekwa endaweni epholile. Cofa igama umkhusu ukuthola iresiphi yokwenza umkhusu.
- Umthubi wubisi lwenkomo esanda kuzala oluphekwa lodwa, okungesilo elokwenza amasi, olusengwa ngoba kwenzelwa ukuthi ubisi lungayigulisi inkonyane uma seluluningi kakhulu kunina wayo.
- Umhluzi yisobho lenyama esuke iphekiwe. Lelisobho kuyaba ngelenkomo, ngelenyama yenkukhu, noma ezinye izilwane zasekhaya. Abanye baphunga ngisho umhluzi wenyamazane ebanjwe enqineni.
- Ikhuthu libuye libizwe ngomqwayiba ngoba incoso eyomisiwe. Kuphekwa inyama ngebhodwe igxajiswe, okuthi uma isivuthiwe ilungiselelwe ukumaywa. Ukhuthu lubekwa phezulu ogibeni emsamo lulengiswe luze lome. Lusetshenziswa kakhulu njengomphako uma kuzothathwa uhambo.