Kwathi ke kaloku ngantsomi.
Kwakukho izigebenga ezaziyokuzingela into etyiwayo. Zahamba, zahamba, zahamba, zingade zifumane kwanto. Kwade kwasebusuku zizingela, zagqiba kwelokuba mazibuyele ezindaweni zazo ze zibuye zizingele kusuku olulandelayo. Zafathula kobo bumnyama endleleni egodukayo, zihamba zihlofeka kumahlahla nemixawuka. Kwabakho esi sigebenga siye sabona igxamesi, saza sayokungena kulo. Kwakusekumnyama tsiki, ungenako nokubona nomnwe lo. Sithe sisakube siphakathi sabona kukho ilahle elikhanyisileyo embindini wendlu. Seva kukho iphepha sacinga ukuba siphembe ngela lahle ukuze kukhanye. Sithe xa sibeka iphepha elahleni, kanti ixhola iliso lekati, yasithi bhaxu esandleni ngeenzipho zayo. Sothuka sabaleka. Sithe xa siphuma emnyango yakhonkotha inja. Yeka ke ukuphethuka kwaso ukuya ngasebuhlanti, kanti siye sayokubetheka emlenzeni wembongolo, yatsho ngenqina esifubeni. Sadidizela sayokuphumela ngaphaya kobuhlanti. Sithe xa sithi tyishi kanti lixesha lokukhonya kweenkuku watsho umqhagi, “Kukurukuuuuuuugu!” Hayi ke, saphaphatheka ukuya kutshona.
Ngomsobomvu sayibona indlela egodukayo. Yeka ke ukunyusa isantya ngokungathi siva izingqi zaba bantu bebemphethe kakubi. Ufike koogxa bakhe sel’ emaphikwana. Zabuza ezinye izigebenga ukuba bekwenzeke ntoni na. “Ndiye ndalahleka andanibona ukuba niye ngaphi na,” lichazile ixhoba. “Nako ke ndibona igxamesi ndayakungena kulo, kwabe kumnyama thsu. Ndithe ndisajongile ndabona ilahle embindini wendlu, ndathi xa ndikhanyisa latsho ihlahla lameva engalweni. Ndithe xa ndithi ndiphumela phandle, nako kukhwaza umntu esithi, “Nanko! Nanko! Nanko!”. Hay’ ke, nako ndiphaphatheka ndiyokugileka komnye umntu ovele wanditsho ngegqudu esifubeni. Hay’ ke elo nqindi linditsho ndadidizela. Ndiqondile ukuba ngoku kubi, ndiyahlaselwa. Nako ke ndicela kwabanentsente, ndingasayazi nendlela emandiyithathe.” “Ndithe xa ndithi tyishi, ndilishiya lodwa elo gxamesi, ndeva kukho okhwazayo esithi, “Rhiwuuuula! Rhiwuuuula! Rhiw’la ngaphambiiiili”. Khange ndiphinde ndibe sema ke ngoku njengokuba ndizokufika aph’ ekhaya,” silebele ngalawo ke isigebenga.
Phela, phela ngantsomi.
Imfundiso: Musa ukuphazamisa abanye abantu endaweni yabo yokhuseleko ze ufune ukwenza ngokuthanda kwakho, ngaphandle kokubonisana nabo.