Asho ukuthini amaphupho ngomthetho, icala nesijeziso? Lokhu kuhlanganisa ukuboshwa, izinkantolo, abaseshi, uzankosi, amajaji, amaphoyisa, amajele, izijeziso namafa.
Uma uphupha ukuthi ufunda iphepha elinezifiso zokugcina noma kukhona ifa olushiyelwe lona ngoseshonile kusho ukuthi uzolahlekelwa yinto ebalulekile kuwe.
Uma uphupha ukuthi uthole isamanisi kusho ukuthi uzoba nempilo enokuthula futhi uzwane nawo wonke umuntu omaziyo.
Uma uphupha ukuthi ujeziselwa okuthile kusho ukuthi uzoba nenhlanhla maduzane.
Amaphupho anezincazelo ezahlukene, kukhona lezo eziqondile kuphinde kubekhona nalezo ezifihlekile. Ukuphupha amaphoyisa kusho okungekuhle, okungabalwa phakathi kwakho yizitha zakho, noma ke isifo esiza koseduze nawe. Uma uphupha ukuthi ubona amaphoyisa noma amasosha, kusho ukuthi kunento embi esazokwenzeka. Uma ulwa noma uxoshwa ngamaphoyisa lokho kusho ukuthi kunezitha ezikuthakathayo noma ezikugadla ngemithi.
Uma uphupha ukuthi uthathe isifungo kusho ukuthi ubunzima obhekene nabo manje buzophela maduzane.
Uma uphupha ukuthi uwine icala lomthetho kusho ukuthi uzonqoba izitha zakho uphumelele.
Uma uphupha ukuthi ukhuluma nommeli kusho ukuthi uzolwa nomuntu maduzane kodwa uzonqoba. Uma kunguwena ongummeli kuhle kakhulu. Uzohlonishwa ngezenzo zakho ezinhle.
Uma uphupha ukuthi uvela phambi kwejaji kungenzeka ucelwe ukuthi uchaze ngezinto oke wazenza. Uma kuhamba kahle izinto ezinhle zizokwenzakalela – ikakhulukazi emsebenzini.
Uma uphupha ukuthi ufakwe ozankosi ungabhekana nesiyengo esizokufaka enkingeni enkulu uma ungaqapheli.
Uma uphupha ukuthi ukhuluma nomseshi inkinga onayo izoxazululeka maduzane.
Uma uphupha ukuthi usenkantolo kusho ukuthi uzonqoba izitha zakho. Uma ukhona ngoba ungufakazi ecaleni kusho ukuthi uzobizwa ukuthi usize umuntu omaziyo maduzane.
Uma uphupha ijele, noma ukuthi usejele lokho kuyinto enhle. Kusho ukuthi uzoba nenhlanhla emsebenzini ube nodumo futhi uphumelele ezintweni ozenzayo. Uma weqa ejele kuhle kakhulu futhi kusho ukuthi uzonqoba izinkinga zakho. Uma usebenza njengojele kusho ukuthi abangani bakho bazophuma ezinkingeni maduzane.