Dithoko tsa Bafokeng ba ha Mohaila-Tshepe
Ke Mofokeng wa Mohaila-Tshepe,Motho wa kgomo nkgate ya Mmasebothwana,Kgomo e hatile motjhana monwana o monyenyane.
Ke Mofokeng wa Mohaila-Tshepe,Motho wa kgomo nkgate ya Mmasebothwana,Kgomo e hatile motjhana monwana o monyenyane.
Ke Mofokeng wa Mmamokgadia Motlalane,Molemane, molematsela,Molema-tshimo a sa e phophothe,Motho wa Mmamoraredia Phohole,Wa Maotwana finyela.
Ke Motlokwa,Ke motho wa Seala se kgaohile, Motonosi.Ha se a kgaoha se entse lehohoba.Ke motho wa ha Makoro,Wa ha mankga lefotha,Le mohla ho sa hlajwang,Le ntse le nkga lefotha.
Motlokwa wa ha Mmanthatisi,Motho wa Tshotetsi wa Lebaka,Motho ya neng a nyele mokopu,Wa MmaMohato wa Botha Bothe,Motho wa Kubu, ke nare ya tsolo le lefubedu,Le neng le otle habedi ka hara kereke,Le ipatlela ngwana lona, Ntlenyana,Selepe, Mokgesi o hana kereke,O etellwa pele ke baruti ka tseleng,Le wena ka moso ba tla o etella!
Ke Motloung wa ha Sejake,Wa Mmatsatsi, mpone,Wa Mmaditlou, di fula hae,Di hloka baalosi. Kapa ho thwe Ke Motloung wa ha Mmasejake,Wa kgomo e thokwana,Ha e tswala motsheare e a hlola,Eo mohlatla o jewang ke sebono.
Ke Motloung wa ha Maloka,Wa Mmatlou di fula hae,Ke ho hloka badisana.
Ke Mofula Mokolobeng,Motho wa Marasakane,Moana-kolobe,Moana-phoofolo a e ja,Malema-feela, a sa phophothe,Mmadinakana ka hanong.Ha o batla kgotso, kgotso ke nala.Ha o batla ntwa,Bona metsu qholong ka kgohlopong,Marumo ke seqhanyane sa ntwa,Hela mokola ona ke Raseqhanyane,Ke Mofula, Matsetlelana hantle.
Ke Lehowana labo Tlalane,Ke motho wa Mahase a Mpewana,Ke hasa dikgomo,Ke hasa le batho,Ke hasa le dipudungwana naheng,Ke ngwana Tau ya Matsebela,Nong ha e ntje, mmane e mpone,E tshaba ha e tla tshwehla molomo!
Ke Mofokeng, Ngwana kgomo e tshwana,Kgomo ya seema-ka-lelebe thoteng,Ya nna ya hlaba mangope ho heleha,Ke Lemphane, Ke ngwana kgomo e tshwana,Ya ho ema thoteng,Motho wa Mmamosonotsokotsa,Motho wa Mmanywana,Motho wa Mmamalebe!
Ke Mokwena wa Mokotedi,Wa ha Mmualle wa Litha,Wa mohlamu o mofubedu wa kgomo,Motho wa ha tlapa ha le ribollwe,O ka le ribolla,Wa fumana phamphang ya masepa.