Ke Mofokeng wa Mokgadi wa Motlalane,Molemane, molema-tsela,Mokgatha-thite-ka mmoho a sa e qete.Ke Mofokeng Mokomana,Wa Mmamoraredia Phohole.Rarollang babo Mare dithapong,Ba rarehile ke ho ja hlooho ya kgomo,Ba jele hlooho ya kgomo e le baena.
Ke Mofokeng wa Mmamokgadia Motlalane,Molemane, molematsela,Molema-tshimo a sa e phophothe,Motho wa Mmamoraredia Phohole,Wa Maotwana finyela.
Ke Mofokeng wa Mohaila-Tshepe,Motho wa kgomo nkgate ya Mmasebothwana,Kgomo e hatile motjhana monwana o monyenyane.
Ke Mofokeng Wa Mantsukunyane a Kata a Sefiri,Bakgwele ba titima mabitleng,Thotsela sa Mokgwele ha se je moroko,Se ja dipolokwe!Fokoletsang Bakgwele dipolokwe,Ha ba ata ba tla re bolaya.
Ke Mofokeng wa Mmamaotwana finyela,Wa Mmamoraredia Phohole,Wa maotwana a kaa ka dinaledi,A kaa ka jwang ba tshaane,A kaa ka jwang ba molelengwane.
Ke Mofokeng wa ha Tshele,Wa Lekotwane la mmulana motlala,Motho wa Mmannoha e talana,Ya jang mmutla o le tala,A o ja ditsebe a siya mmele,Lekwekwe ke lang ha Tshele,Ke la mohla ho neng ho tsekwa marapo.
Ke Mofokeng, Ngwana kgomo e tshwana,Kgomo ya seema-ka-lelebe thoteng,Ya nna ya hlaba mangope ho heleha,Ke Lemphane, Ke ngwana kgomo e tshwana,Ya ho ema thoteng,Motho wa Mmamosonotsokotsa,Motho wa Mmanywana,Motho wa Mmamalebe!
Ke Lehowana labo Tlalane,Ke motho wa Mahase a Mpewana,Ke hasa dikgomo,Ke hasa le batho,Ke hasa le dipudungwana naheng,Ke ngwana Tau ya Matsebela,Nong ha e ntje, mmane e mpone,E tshaba ha e tla tshwehla molomo!
Hetli, o hetlang pereng tsa batho?O hetla eng kamora disale?O hetla nama tsa mefuta esele;Mora Mpedi, leshodu la nama,Ha le sa mo fe etlabesale a hetlile. Mofokeng, motho wa Modise,Modise wa melatjana,Koloti e tona, seetalla;Mmotho wa tlapa ha le ribollwe,Wa leribolla wa bona mehlolo. Kapa ho thwe Ke Mofokeng wa ha Modise,Wa ha Molatswana,Motho wa …