Nna ke nna Ramebila,
Ramebila a Matsietsa Kgope
O ntseng gotwe basimane ba Bakgatla
Ba nyetse go setse Ramebila,
Kante le ene ga a sala o tla nyala.
Ke kgagarapa phelehu, e mphikela
O ne o thetse ka nko fela,
Ka dintlha tsa go ka hularelwa.
Ke setsepatsepa sa selo lebelo,
Tsipatsipa kwa ga Mmanape-Tshukudu.
Erileng go sa, phalafala ya marumo
Ya kgelebetega kwa thabeng tsa Mogale
Ya utlwala kwa ga Mmanape-a-Tshukudu
Banna ba ema ka diema
Ba re na oake Setsepa,
Setsepa, le mmatlelang mo lapeng,
Le tswe le itse e le Ramebila,
A ba a le kwa mebileng.
Ramebila ga se ene o setseng a raletse, dithota le dithotana,
A tshela molapo le melatswana,
A ba wela madiba a magolo,
Noka tse dikgolo, tsa metsi a kgaso e kwa godimo,
A leselasela ka thello bodiba
A ba yo tsena, kwa mafatsheng a sele,
A tshela mafatsheng a boeng
Mafatsheng a bo-gomosagabosing,
Ramebila ke ene a tlileng a gapile kgongwana-tshwaana,
A tla a gapile kgongwana-tshwaana
Kgomo ya lesika,
O ntseng go twe Ramebila o nnetse
Go ala meseme ya basadi,
Dikgomo di tla diswa ke mang?
Ya phanya naledi e tswa ka fa Borwa,
Gwa rotha Motlogelwa, o tlogetsweng
Ke bomogolwe, A ba opa mokgosi are:
Bo-nkgonne, mpoeleng le seke la ntlogela,
Ke ngwanagaabo Mogatusi-a-Marumo,
Ge tau di duma sekweng,
Ngwana Mogalefi-a-Marumo,
Marumi a bolla.
Kgaitsadia MmaSeleka le Mmankwane.
A o nke nka tswelapele,
Nka le tlhomolapelo.
Metswedi ya leboko: Kgoroeadira, K.O. (1993) The Praise Poetry Of The Bafokeng Of Phokeng.