Ke Motlhabane wa nokana e tshwaana
E senang mokgokgotsho
Motlhabane wa nokana e tshwaana
E senang mokgokgotsho,
Ngwana wa gaabo Mmalenala wa Machema.
Yo rileng a tswa Moleji
A be asa tshabe,
Ya re a tla Phokeng a tshabiwa
A tshabiwa ke Ramagono a Mmusi.
A nnare Mmalenala o ntsaya masepa?
A nka go tsaya masepa,
Ke se divarka, ke se dikolobe
E nnile Letatakgolo le le kgomo e ntlha
La kgomo yaabo Morati wa Mmatau
Wa gaabo Kgatitsoe.
A nka go tsaya masepa,
Ke se divarka, ke se dikolobe
Ke sa tsamaye ke olla batho,
Ke motho wa gaabo Mmapuso
Ke Semanego le Mmamodidi.
Ngwanyana o marago a sephaphathi,
O marago a bopharaphara
O ka re mogatla wa phelehu,
O kileng a bopaganwa le kgomo a e thala
Motho wa gaabo Jakapo.
O kileng a bopaganwa le kgomo a e thala
Letatakgolo le le nko ntlha,
La kgomo ya gaabo Morati wa Mmatau wa Kgatitsoe.
Tlou ga e nke e metsi a le matala
Gobane e tshaba nko go kokanwa.
Motlhabane, Ditlou!