Maele ka ga mathata

  • Go anyela o sena kgamelo – Motlhoki ga a fiwe sepe ke ope.
  • Go apesiwa kobo ka letshoba – Go sokodisiwa ke sengwe kgotsa mongwe ka lobaka. Go jela yo mongwe leruo le dilwana o bo o di fetsa ka bosetlhogo.
  • Go baya tau botsetse – Go tshela ka phuthologo mo seemong se se borai. Go dira tiro e e bosisi thata.
  • Go bo rupa, o bo o bosilela – Go tewa bogwera (bojale) : Go tshwara bothata.
  • Go di gama o sa di tlhapela – Go nna mo mathateng. Go bona kotlhao e e thata ya molato.
  • Go e nametsa thaba e tlhotsa – Go oketsa mathata a yo mongwe ka go bua dilo.
  • Go ikepela lemena – Go itsenya mo mathateng.
  • Go loma ka tlhaha – Go tshwara bothata
  • Go nna modidi wa nta e e motopo – Go humanega mo go utlwisang botlhoko
  • Go ipolaya wa tloga wa re o loilwe – Go ipiletsa mathata
  • Go tshwara phage ka mangana – Go tshwara bothata.
  • Go ya magaleng gabedi o se mothudi – Go boga se o kileng wa se boga pele, go ikisa mathateng le dipogong gape.
  • Go itshela moko wa talane – Go ipiletsa matshwenyego.
  • Go tsenya tsebetsebe – Go tshwaenya; go kgarakgatsha mowa.
  • Go imelwa ke tlhogo – Go nna le mathata a mantsi. Go nna le mokgwa wa boikgogomoso.
  • Go ja ntswa – Go humanega.
  • Go rwala diatla mo tlhogong – Go nna mo tlalelong.
  • Go ja mantle a balekane ba gago – Go sotlega.
  • Go kgotlha semane – Go rumulana; go bitsa mathata.
  • Go palangwa ke sekwakwalala – Go tlelwa ke madimabe.
  • Go baba dinao – Go tsamaya bobe.
  • Go tsenya mo dipharagobeng – Go tsena mo mathateng.
  • Go ja di sa weleng – Go sa iketleng. Go sa itumedisiwe ke sengwe.
  • Ga e ne e a komakoma – Go thata; go dubegile.
  • Go itshela madi a kgofa – Go itsenya mo dipuong gongwe meferefereng e e kgakala le wena.
  • Go ja ditlhare ka meno – Go tsenwa.
  • Go ja mathe a balekane – Go humanega o bo o kopa batho ba ba neng ba dira le wena mme ba ipeetse.
  • Go ja mmewa – Go fetsa dilo tsa ba bangwe.
  • Go kgwa lethe go thelela – Go baka; go ithuta ka botlhoko.
  • Go laolwa ke lonao – Go tsamaya bobe.
  • Go nna fa gare ga dinaka tsa nare – Go nna mo diphatseng tse di sisimosang mmele.
  • Go nna mosima wa phika godimo – Go nna o letetse tiragalelo e e maswe e e diphatsa.
  • Go ora molelo o kotame – Go tlhoka boitapoloso; go tshwenyega – Go sa nnisege.
  • Go sita marema – Go palela ba ba nang le dithata.
  • Go thanya lomapo lo le tsebeng – Go thanya o sa bolo go tsiediwa; go di tlhaolela di bekerwe.
  • Go tlhakanya tlhogo – Go emisa tlhaloganyo.
  • Go nna dikobo dikhutshwane – Go tlhoka; go humanega.
  • Go ithwesa morwalo – Go ikimetsa ka mathata le matshwenyego
  • Go jesetsa kgodubeng – Go tsenya motho mo mathateng
  • Go tsamaela dinao go ruruga – Go tsamaela lefela.

Leave a Reply