Ke tswa go utlwa ka pitso ya maloba,Leswape asa bue a korobetse,
Go bua go ngunanguna Bakgwatlheng,
A ga lo ka lwa tlosa Tlhabaki a bolelela Bakgwatlheng,
A bolelela bo-Mma-Moapare are ntwa e letse mo sekgweng,
E iphitlhile mo majeng a dinare.
Tshegetsa naka lo ntlha ya mmutlwa lo tlhabileng marena,
Lo tlhabileng Dinkotlhane mo maleng,
Maswi a kgomo a ditlhase o thoma a a goduma Melongwane,
Maswi a fisitseng bo-Melongwane ditedu,
A ga ke a tlhoma ka anapa-anapa koitana,
Ka fitlhela nama ya kgomo e gatane, ka ba ka boa ke menne letsogo,
Nku-tshweu e tswa tsogong ja kgosi,
Ke ka re ke e tlhaba ka tshega-tshega,
Ka ya go e ja le Mmamodise, kae ja le mosadi ke mo ratile,
Ke kopane ke Khakhane maloba are o feta go bolawa Dinkotlhane,
Tau tse ditona dile pedi di mo tlhakanetse,
Motho a tshwere ke tau ya ditawana asa falole,
Marumo a tletse mo dikuaneng,
Lo boe ka ona loye go a baya lo a boloke,
Ngwanaka ga o mphe o ntebetse,
O ntaditse le nthenyane sebeteng, ebile ke eletsa go metsa motho,
Kgomo e ntsho e gana le mosadi wa borwa,
E gana le phephenyane o ka re lo e ntsha lo e nnaya,
Molapo o boteng re o nwa le Bangwaketse,
Ba o nwa ba o gogola, rona re nwa re o gopa Bangalopa.