Dithoko tsa Bafokeng ba ha Mmamokgadia Motlalane
Ke Mofokeng wa Mmamokgadia Motlalane,Molemane, molematsela,Molema-tshimo a sa e phophothe,Motho wa Mmamoraredia Phohole,Wa Maotwana finyela.
Dithoko tsa diboko le difane
Dithoko tsa Bafokeng ba ha Mohaila-Tshepe
Ke Mofokeng wa Mohaila-Tshepe,Motho wa kgomo nkgate ya Mmasebothwana,Kgomo e hatile motjhana monwana o monyenyane.
Dithoko tsa Bafokeng ba ha Mantsukunyane
Ke Mofokeng Wa Mantsukunyane a Kata a Sefiri,Bakgwele ba titima mabitleng,Thotsela sa Mokgwele ha se je moroko,Se ja dipolokwe!Fokoletsang Bakgwele dipolokwe,Ha ba ata ba tla re bolaya.
Dithoko tsa Bafokeng ba ha Phohole / Mmamaotwana finyela
Ke Mofokeng wa Mmamaotwana finyela,Wa Mmamoraredia Phohole,Wa maotwana a kaa ka dinaledi,A kaa ka jwang ba tshaane,A kaa ka jwang ba molelengwane.
Dithoko tsa Bafokeng ba ha Tshele
Ke Mofokeng wa ha Tshele,Wa Lekotwane la mmulana motlala,Motho wa Mmannoha e talana,Ya jang mmutla o le tala,A o ja ditsebe a siya mmele,Lekwekwe ke lang ha Tshele,Ke la mohla ho neng ho tsekwa marapo.
Dithoko tsa Bafokeng ba ha Mantoto
Ke motho wa Mantoto,Motho wa Mmaletlapa-ha-le- ribollwe,Wa Malejanasehlotshwana,E a kgopa, Ramotshedisi,E seng e kgopa basadi ba batho,Motho wa Malejanasehlotshwana,Motho wa Mahlonohlono,Motho wa Maphakamisa-molense,Motho wa Mahlono e a phoma.
Dithoko tsa Batlokwa ba ha Mmanthatisi
Motlokwa wa ha Mmanthatisi,Motho wa Tshotetsi wa Lebaka,Motho ya neng a nyele mokopu,Wa MmaMohato wa Botha Bothe,Motho wa Kubu, ke nare ya tsolo le lefubedu,Le neng le otle habedi ka hara kereke,Le ipatlela ngwana lona, Ntlenyana,Selepe, Mokgesi o hana kereke,O etellwa pele ke baruti ka tseleng,Le wena ka moso ba tla o etella!
Dithoko tsa Batlokwa ba ha Motonosi
Ke Motlokwa,Ke motho wa Seala se kgaohile, Motonosi.Ha se a kgaoha se entse lehohoba.Ke motho wa ha Makoro,Wa ha mankga lefotha,Le mohla ho sa hlajwang,Le ntse le nkga lefotha.
Dithoko tsa Bafokeng ba ha Mamphane
Ke Mofokeng, Ngwana kgomo e tshwana,Kgomo ya seema-ka-lelebe thoteng,Ya nna ya hlaba mangope ho heleha,Ke Lemphane, Ke ngwana kgomo e tshwana,Ya ho ema thoteng,Motho wa Mmamosonotsokotsa,Motho wa Mmanywana,Motho wa Mmamalebe!
Dithoko tsa Bafokeng ba ha Mahase
Ke Lehowana labo Tlalane,Ke motho wa Mahase a Mpewana,Ke hasa dikgomo,Ke hasa le batho,Ke hasa le dipudungwana naheng,Ke ngwana Tau ya Matsebela,Nong ha e ntje, mmane e mpone,E tshaba ha e tla tshwehla molomo!