Miḽoro nga ha mashudu mavhi kanzhi a i tei u ṱalutshedza kana u ṱalutshedzwa sa izwi i tshi vha yo tou bva yo you ralo i na ṱhalutshedzo – zwine zwa bvelela kha muloro ndi zwine zwa nga bvelela kha zwa vhukuma. Fhedzi nga kha miḽoro vhusiku vhadzimu vhaṋu vha ni sumbedza uri hu na zwithu zwavhuḓi na zwivhi zwine zwa nga bvelela, kana zwi tsini na u bvelela. Miḽoro ndi ya ndeme, ni songo i hangwa musi ni tshi vuwa nahone ni ḓivhe u i ṱalutshedza. Arali ni sa koni u i ṱalutshedza, vhudzisani vhahulwane ngauri zwi a konadzea uri ni khou vhudzwa tshiṅwe tshithu nga vhadzimu.
Fhethu Ha Swiswi na U Tevhelelwa Nga Murahu
Arali na lora ni swiswini, hu nga vha mashudu mavhi arali ni sa koni u bva afho fhethu. Ni khou sumbedzwa uri nyimele ndi mmbi nahone zwithu zwaṋu a zwi khou tshimbila zwavhuḓi. Mashudu mavhi a nga vhangwa nga muthu ane a vha muloi ane a sa ṱoḓi uri ni vhe na tshiṅwe tshithu tshavhuḓi vhutshiloni. Naho ni tshi lingedza u ita zwithu zwine zwa nga ni isa kha u bvelela, a hu na tshine tsha shuma. Arali ni na uyu muloro lunzhi nahone ni muthu ane a tenda kha dzilafho ḽa sialala, ndi zwa ndeme uri ni ye u dalela vho Maine. Vhatendi vha Vhukriste vha nga rabela u swika nyimele i tshi khwinifhala.
Arali na lora muṅwe muthu a so ngo ambara a tshi khou ni tevhela, naho ni tshi mu ḓivha kana hai, izwi zwi nga amba uri ni khou yo vha na mashudu mavhi kana mulingo wo poswaho kha inwi. Tshiṅwe tshifhinga zwi a bvelela uri muṅwe ane na mu ḓivha a tshi bva a tshi vha ene a posaho mulingo kha inwi.
Maḓi o Tshikafhalaho
Ni nga lora uri ni khou bambela maḓini o tshikafhalaho, zwenezwo na vhona ṅwana a songo ambaraho nahone na lingedza u mu fara na kundelwa nahone na fhedza ni tshi khou vuwa ni swiswini. Uyu muloro kanzhi u itea kha vhasadzi vho xelalwaho nga mbebo. Ṅwana kha muloro ndi ane o xela. Ṅwana u khou ni sumbedza uri o aluwa nahone u ṱoḓa u itelwa zwiṅwe zwithu zwa sialala. Arali muthu a tevhedza zwothe zwine muloro wa khou amba, u ya fhedzisela o vha wa mashudu a bvelela vhutshiloni. Musadzi a nga kunakiswa. Mishonga i hone u bva kha vho Maine vha sialala. Zwine zwa vha zwa ndeme ndi uri munyanya wa u kunakisa u tea u itelwa ṅwana, u “mu ambadza” na u mu vhidza nga dzina. Arali muthu a tevhela zwitenwa zwo bulwaho afho nṱha, zwithu zwavhuḓi zwi nga bva khazwo.
Vhuvhava
Arali na lora ni tshi khou gevhengiwa tshelede nga muṅwe kana na lora ni tshi khou ṋewa tshiṅwe tshithu nahone muṅwe a tshi ni tswa, izwi zwi nga vha mashudu mavhi. Ni nga gevhengiwa/ fhuriwa mpho ye na ṱanganedza kana ya ḓo ṱanganedzwa. Kana zwi nga amba uri muṅwe o dzhia mashudu aṋu nahone a a ita awe.
Kanzhi ndi muṅwe wa muṱa ngauri naho mutsinda a tshi nga zwi ita, ha ḓivhi vhadzimu vhaṋu. Ngauralo, arali mutsinda a tshi ita tshiṅwe, tshi nga si shume zwavhuḓi ngauri vhadzimu vhaṋu vha a ḓivha u ni ḓisela mashudu avhuḓi. Fhedzi arali e muṅwe wa muṱa zwenezwo u a ḓivha uri a nga amba hani na vhadzimu vhawe na vhaṋu. Ni nga lugisa izwi ngauri uyu ndi muthu tsini na inwi, na vhadzimu vhaṋu ndi vhathihi na vhawe, Vhadzimu vha nga vhona nyito dzaṋu nahone vha nga ni lwela nga maanḓa u fhira zwine vho no zwi ita. Mafhedziseloni, ni vhona ngauri uri zwithu zwoṱhe zwine na lora nga hazwo zwi bvelela kha muṅwe wa muṱa waṋu, zwine zwa vha tsumbo ya uri ho vha hu ene tshifhinga tshoṱhe.
Zwiambaro zwa Kale na Tshelede Ya Mawayawaya
Arali na lora muṅwe a tshi khou ni ṋea zwiambaro zwa kale kana a tshi khou ni kuvhisa zwiambaro zwawe zwa kale, nahone maḓi ane na khou kuvhela zwiambaro khao o tshikafhala nahone vha tshi khou sukumedzela zwiambaro zwo tshikafhalaho tsini haṋu, izwi zwi nga vha mashudu mavhi nahone muṅwe u khou ḓisa swiswi muḓini waṋu. Arali muṅwe a tshi ni ḓisela rokho ntswu, zwi nga vha tshiga tsha mashudu mavhi. Arali na hana u dzhia rokho kha muloro, uyo we a vha a tshi khou lingedza u ni i ṋea a nga ṱangana na mashudu mavhi.
Tshiṅwe tshifhinga na lora ni khou ṋewa tshelede ya mawayawaya kana ni tshi i wana musi ni tshi khou tshimbila. Tshelede ya mawayawaya i nga amba mashudu mavhi nahone zwiṅwe zwithu zwi nga si tshimbile zwavhuḓi kha inwi vhutshiloni. Kana tshiṅwe tshifhinga ni khou sumbedzwa uri hu na zwithu zwi sa khou tshimbila zwavhuḓi.
Lufu
U lora govha ḽa mbulungo zwi amba uri hu nga vha na vhulwadze muṱani.