Arali na lora nga ha lukanda lwaṋu, zwi nga amba zwithu zwavhuḓi kana zwivhi, zwi tshi ya nga zwine zwa khou itea khalwo. Arali na lora zwipundu kha lukanda lwaṋu, zwi nga vha zwi tshi khou amba zwithu zwavhuḓi kha vhushaka haṋu. Ni nga ṱangana na muṅwe hu si kale kana na isa phanḓa na lufuno kha mufunwa waṋu wa zwino. Arali na lora lukanda lwaṋu lu tshi khou tshetshekaniwa, naho zwo ralo, izwi zwi nga amba uri muṅwe ane na mu fulufhela a nga fhedza e swina.
Zwilonda kha lukanda/u tshetshekaniwa
Arali na lora lukanda lwaṋu lu tshi khou tshetshekaniwa nahone lu tshi khou dodzwa mushonga nga ndila ine zwa itwa nga sialala, arali ni sa khou lwala zwi nga amba uri ni na swina ḽine ḽa khou lingedza u shumisa mishonga ya sialala kha inwi. Tshiṅwe tshifhinga muloro uyu u nga vha u tshi khou ni sevha uri ni tea u vuwa na wana thuso ngauri muṅwe u khou lingedza u shumisa vhuloi kha inwi.
Arali no no lwala nahone na lora lukanda lwaṋu lu tshi khou tshetshekaniwa nahone lu tshi dodzwa mushonga sa zwe zwa anzela u itwa u ya nga sialala, izwi zwi nga vha tshiga tshavhuḓi tsha uri ni ḓo fhola na u wana thuso ine na i ṱoḓa. Arali kha muloro wanu ni tshi vhona maine a tshi khou tshea zwirema na u dodza mishonga khazwo, izwi zwi nga amba uri hoyu ndi muthu ane ni nga wana thuso khae ya u fhola.
Arali zwirema zwi tshi itwa kha lukanda lwaṋu fhedzi hu si na mushonga une wa dodzwa khazwo sa zwine zwa anzela u itwa, izwi zwi nga amba uri ni ḓo ṱangana na thaidzo dzine dza ḓo ni vhangela vhuleme, na u haṱuliwa nga vhathu vha ndeme vhutshiloni haṋu.