Bana ba bua le Modimo – Bana ke madi a a se nang molato.
Bana ba kgori, monokwana o seng, tshika e ya baneng e a kgaoga – Bana ba batho ba ba tsalanang gantsi ga ba tlwaelane, ba itsana. Gantsi fa tshika e gola, bana ba motho ba a amologana.
Bana ba tadi ba itsiwe ka mereto – Bana ba motho ba lemosega ka maitseo a bone.
Bana ba tladi ba anyela leratleng – Bana ba motho ba tlwaela leratla la gagwe. Fa motsadi a le bosilo mo baneng, e a re fa go ile ba twaele go nna ba omanngwa.
Bana mamphorwana, maatlhamela babolai – Bana ga ba itse le yo o ka ba bolayang.
Banna ga ba na thwadi, ba bonwe ke Mmamariga – Banna botlhe ke baaki. (thwadi-boammarure)
Botlhale jwa phala bo tswa phalaneng – Ngwana fa a setse a godile o tswa mogakolodi wa motsadi wa gagwe.
Dipaba di tsogetsa badisa nageng, tsa feta tsa ja borraabo kwa gae. Bana ba dira melato kwa ntle mme e pegwe batsadi godimo.
Poo tsa bogwe, di lwa di iname – Bana ba motho ba lwa ba tla ba boifana.
E ipotlapotla e bona morwadi – Ngwana o betologa fa a itse gore o tlaa rapelwa.
E e maswi ga e itsale – Bana ba ka nna ba tlhoka go gotsa molemo wa batsadi ba bone.
E nyemanyema e bona mmelegi – Ngwana gongwe motho o iteseletsa fela mo botshelong fa a na le yo a ka mo direlang tsotlhe.
Ga e dume e tswa lerung – Ngwana wa mogale, o itshupa ka bogale.
Ga e ganane e le teng fela, le e e ntle e a ganana – Go tetwa tsalo: Motho fa bana ba gagwe ba sa tsalega, o tshwana fela le yo o ganneng ke tsalo, ke gore, yo o senang bana.
Ga e ke e ja ngwana e sa mo tsala – Ga e ere motho kgotsa ngwana a tshabetse mogolong a abelediwe mo go ene.
Ga go a twe tima mogoloo, ga twe se roge mogoloo – Bana ba mpa ba a fana.
Ga go ke go twe o gola leng, go a twe o tsalwa leng – Ngwana a setse a tsetswe, ke motho.
Ga go motsomi o jang sa yo mongwe – Motsadi yo o tshwaetseng bana dikgomo e ka nna ya re ba mo tima ga pereko ya bone, a ja dikgomo tsa bone.
Goo-segole ga go lelwe – Ga e re ngwana a tsetswe e le segole go utlwiwe botlhoko jaaka fa a ka bo a sule.
Go ubela tshipi bobe ke go e tlosa matlhagasu – Go omanya ngwana gantsi go mo tlhokisa tsebe.
Ka tlhagolela mookana, ya re o gola wa ntlhaba – Ka godisa ngwana mme ya re a godile a mpataganela le baba kgotsa a ntlhanogela.
Kgogwana go swa e tsaeng, e e kwa ntle e a ipapalela – Masielana a mannye a ka bolawa ke tlala, a magolo a a intshenkatshenkela.
Kgomo ga e ke e tlhaba mong wa yone – Ngwana wa tota o tlotla motsadi go ya losong.
Lefifi le jele ngwana wa lone – Motho yo o maswe yo o rutang bana ba gagwe bosula o ba itlhaganedisetsa lesong gongwe kgolegong.
Lefifing go tshwaraganwa ka dikobo – Bana ba masika ba itsana le mathateng.
Ina-lebe seromo. Leina le le maswe le dira ngwana gore a le tshwanele – Leina le lebe le dira gore mong wa lone a sale bokao jwa lone morago.
Lemphorwana le atlhamela babolai – Ngwana yo monnye ga a ke a itse go farologanya batho ba ba siameng le ba ba bosula, gonne a sena kitso epe.
Lesilo le tsalwa le matlhale – Bana ga ba gotse batsadi botlhe, bangwe ba tswa diphokojwe fela.
Leswetsana ga le ke le lela fela, le a bo le utlwile maswedi a magolo – Bana ba ithuta thogano le ditlhapa kgotsa mekgwa go bagolo ba bone.
Letlaleanya, ntwa! – Ngwana yo mmaagwe a tsewang ka ene o atisa go tsosa kgang le bana ba lenyalo.
Lore lo ojwa lo sa le metsi – Ngwana o rutwa mekgwa e mentle a sa le monnye.
Mabala a kgaka a bonwa dikgakaneng – Gantsi bana ba gotsa batsatsi ba bone. Bontle jwa ditiro tsa batsadi bo lemogwa mo baneng.
Mahura a ngwana ke go rongwa – Ngwana o solega molemo ka go nna a rongwa.
Malata a ithuna a ile kgonnye. Bana ba tlotla kaga diphiri ka kgololosego fa bagolo ba bone ba se yo.
Mamphorwana maatlhamela babolai– Bana ka go sa itseng sepe ba sa tshabeng baba ba batsadi ba bone.
Maraganela-teng a bana ba mpa ga a tsenwe – Dikamano tsa bana ba motho ga di tsenatsenwe.
Marojana maitisi, maboa-a-ikgorosa – Bana ba ba sa tlhokomelweng ke ope ka molao, ba ipha molao ba boe ba iphapose mo dipharagobeng..
Maswi mannye a mmutle, a baya mmutlana pelo – Ngwana wa mohumanegi o godisiwa ka dijo tsa botlhokwa.
Mmamotse o bonwa kwa mantlwaneng – Tshameko ya bana e tlhagisa se ba tlaa se tswang fa ba godile.
Mmangwana o tshwara thipa ka fa bogaleng – Mong wa selo ke yo o emang katlholo kwa pele.
Molao khutsana e o tsaya sudung – Ngwana wa khutsana o ithuta molao ka go dira ka fa molaong.
Ngwale monnye se lelele lotlhaka thupa di botlhoko – Pele o dira tse di itumedisang itse ditlamorago tsa tsone.
Ngwana e a re go lelela bogwete, a bo newe – Motho yo o tshwenyang ka go rata go itaola, o tle a lesiwe a iponele tsa boitaolo.
Ngwana e a re go lelela legodi a le newe – Motho yo o pateletsang go dira selo se a se ilediwang, go botoka a lesiwe, a se dire gore a ikutlwele.
Ngwana ga se wa motho ke wa batho – Ngwana o tshwanetse go tsaya taelo e e molemo go mongwe le mongwe.
Ngwana lekuka o a sokelwa – Popego e e rategang mo ngwaneng e diragatswa ka boitshoko le neneketso mo kgodisong ya gagwe.
Ngwana ‘a mmangwane nyala, dikgomo di boele ‘sakeng – Masika fa a tseelana, dikgomo tsa bogadi ga di ruiwe ke ba e seng ba lesika.
Ngwana o jelwe ke pelegi – Motho fa gongwe o senngwa ke bopelontle bo a bo direlwang.
Ngwana o sa utlweng molao wa batsadi, o tla utlwa wa manong – Yo o sa reetseng batsadi, o tlaa utlwa ditaelo tsa bagakolodi ba ba bosula.
Ngwana’a rrago e a re go go abela moretlo o tle o mo abele – Fa mongwe-ka-wena a go fa sa gagwe, mo fe le wena se o ka se mo fang
Ngwana sejo o a tlhakanelwa – Ngwana ga se wa batsadi ba gagwe fela, o godisiwa ke setšhaba.
Ngwana wa dikgomo ithute molodi o gopole motlhang malata a ile – Ithute o sa le ngwana tse di tlhokegang go di itse gore le ka moso o kgone go di dirisa mo botshelong.
Ngwana wa mma o anya nyetsane – Leseana le le swetsweng ke mmaalo le diiwa ka letsele la mongwe wa losika yo o sa amuseng.
Ngwana wa mmolelelwa-o-sa-utlwe, o thanya lomapo lo le tsebeng – Yo e reng a gakololwa a itshele moriti o o tsididi, o tlaa a itharabologelwa nako e mo siile.
Ngwana wa monna marapo a tlhageng – Monna a ka nna a swela gongwe le gongwe.
Ngwana wa ntlha ke yo bogadi bo duleng pele – Mo lenyalong la lefufa, mosadi yo o ntsheditsweng dikgomo pele, ke ena wa ntlo ya ntlha, go rialo fa go na le morwa le fa a le monnye ka dingwaga go ba bangwe ba ntlo ya bobedi gongwe ya boraro, morwa yoo ke ene morwa wa ntlha.
Ngwana wa ntlha molekane wa ga rragwe – Ngwana wa ntlha wa mosimane o lebanwe ke ditiro tsa ga rraagwe jaaka go tihokomela leruo Ia gagwe le maikarabelo a lelapa ka motsi o rraagwe a se yong.
Ngwana yo o esi ga a ke a lapa – Ngwana yo o esi o rongwa gongwe le gongwe.
Ngwana yo mogolo o tlhokwa kwa a leng – Bantsi ba ba nang le bajaboswa, ba itshwanela le ba ba se nang nabo.
Ngwana yo o bonya le yo o bonako ke ba rata mmogo – Motho yo o dirang ka pela mme a le tlhoko o a ratega.
Ngwana yo o sa leleng o swela tharing – Fa o sa ikuele o le mo bothateng, o tlaa bogela ruri.
Ngwana yo o sa utlweng molao wa batsadi o tlaa utlwa wa manong – Motho yo o sa reetseng batsadi, o tlaa utlwa ditaelo tsa bagakolodi ba ba bosula.
Ngwana yo o tlhogo-kgolo o sira rragwe – Bosula jo ngwana wa motho a bo dirang, bo senya ditiro tse di siameng tsa bantlo ya gagwe.
Ngwedi o epile pitso – Ke puo ya motho a gakolola yo mongwe gore a se ka a tswa ka sephiri gonne go na le yo o reeditseng.
Ntšwanyana ya maitaya-sebata e bonwa mabotobotong – Ngwana o itshupa se a tlaa se tswang a sa le monnye.
Tau ga e ke e tsala lengau – Motho ga a ke a tshola ngwana yo o farologaneng le ba losika.
Thuswane maswi o a anyile mabeleng – Ngwana ga a ka ke a tlhoka go gotsa motsadi wa gagwe.
Tshukudu kwa gobe e isiwa ke namane – Motsala bana ga a ka ke a ikanela gore ga a kitla a ba a ya ditshekong tsa matlhabisa ditlhong
