Imvelaphi
BakaGama babeSutfu ngekwendzabuko. Kwakunendvodza leyatiwa ngekutsi nguZimbili lebeyihlala etintsabeni tebeSutfu. Yatsi iyatingela ngalelinye lilanga kwavuka inyamatane lebitwa ngekutsi limpofu. Lenyamatane beyingamani nje ibonakale, nakwentekile wayibona wawubonga bakini ngoba lidloti likungenele enguleni (yinhlanhla lengakavami). Kutsiwa wayigijimisa ke lenyamatane Zimbili, ihle ilahleka emehlweni akhe iphindze ivuke embikwakhe.
Luhambo
Nakabona kutsi emehlo sekayangcundzeka (sekucala kuhwalala), bekalala, avuke lokwa kusengakadziliki nematolo (4am) ayitingele, ivuke ibaleke ayilandzele wate wayoyibamba endzaweni lebitwa ngekutsi kuseMawelawela lamuhla. Loku kwasho kufika kwebakaGama endzaweni lamuhla lehlala sive semaSwati. Zimbili wefika bemdzabu basengakafiki ngiko bakaGama kutsiwa makhandzambili. Bona bakhandza emaSan nemaKhoikhoi atihlalela emihomeni kwase ke ngekwandza kwabo besutfu sekaya ngekukhwesha emaSan nemaKhoikhoi. Etulu etintsabeni teMdzimba kwakunendzawo lebeyinetinyamatane letinyenti kakhulu kutsiwa akusitinyamatane kulendzawo lidlanga. BakaGama bayitsandza lendzawo kwagcine kutsiwa kuseDlangeni. Inkhosi Somhlolo yabakha budlelwane nebakaGama kwaba ngibo labayinaka bayifihla emgedzeni wabo ngesikhatsi seyibonyabonyeka.
Kufika kwabo EDlangeni
Yesuka yase iyiswa eMbilaneni. Lomgedze leyabekwa kuwo kuMdzimba wabese nawo sewentiwa ubangulenye ingcobinga yemakhosi emaSwati. Thomas Magagula utsi nakachaza ngendzabuko yesive sakaGama Maphalala Gama watfolwa ngumfati wakaMagagula lobekendze kaMaseko wayingayinga eveni lebakaMaseko eNqabaneni. Wahlala kulendzawo Maphalala wate wafela khona washiya bafana lababili emajaha akhe lawatala kuLaMaseko boNjelu kanye naMafu. Labafana bakhula bababodokotela bemphi. Mafu watala Nsukumbili lowakha umuti wakhe eDlangeni lapho nalamuhla solo kutfolakala khona sive sakaGama.
Budlelwane neMalangeni
Emalangeni bekanebudlelwane lobuhle nebakaGama. Kwake kwasuka lutfuli eludzakeni (kwaphose kwasuka imphi) ngesikhatsi Mantjolo webakaMnisi alima emasimu labelinywe nguNsukumbili. Mantjolo bekahlome ngandzangu (sikhali) nakalima lamasimu enyanyiswa kutsi Nsukumbili sifiki lebekufanele sikhonte kuye njengemsinsi wekumila kulendzawo. Mswati II wabasebentisa kakhulu bakaGama njengoba bebanemakhatsakhatsa emphi. Umntfwana waNsukumbili lobekadvute neNkhosi Mswati II ngekusebenta kwakhe kwakunguZulangangeni. Lomunye wemisebenti lobekanikwe wona kwakukuvimba bakaZulu kutsi bangangeni kutohlasela emaSwati. BakaZulu ngaleto tikhatsi bebaholwa nguDingane, Mpande kanye nangesikhatsi senkhosi Cetshwayo. BakaGama bebakhona kuyivimba imphi igcine ingakafiki. Zulangangeni bekayinceku yenkhosi Mahlokohla. Wahamba naye nakaya eShowe abalekela emaBhunu. Nakabuya neNkhosi wabekwa wabasikhulu sebakaGama eDlangeni.
Zulangangeni watala Dinabantu. Umntfwana wenkhosi Sobhuza II Tfobhi, wendza kuDinabantu. Dinabantu washona asesemuncane Tfobhi, wabese ungenwa nguThoshi Gama watala Nsukumbili II.
Tindzawo
Dalngeni, Zombodze Emuva, Caroline, Sandleni, eShowe, Hlatsikulu.
KaZombodze Emuva, Caroline, Piet Retief
Nkhosi, Gama, mthulela, wena waseLangeni,
Ngon’eMavaneni, sidvwaba silutfuli.
Sandleni, Emadadeni (Newcastle) kaZulu
Gama, mahlobo, loluhlata lonjengencoshane,
Wena longadli imfe ehlobo wesaba litulu kudvuma,
Mahlobo.
Hlatsikhulu, eShowe kaZulu
Gama, Mthombeni, Gutjwa.
Labakutilako
Impofu
Sibongo labasitilako
BakaGama eSandleni batila bakaMahlobo
Umgcwabo
Bebafakwa emgedzeni base bayakuyekela nakukhotsama inkhosi Somhlolo sebahloniphela eMalangeni. Nyalo bangcwatjwa phansi.