Uma uphupha umuntfu lobewutsandzana naye nobe lobekayincenye yemphilo yakho kadzeni, loku kungasho kutsi lowo muntfu uyakuphehla nobe ucabanga kutsi ubuyelane naye. Ngalesinye sikhatsi ungaphupha nge singani sakho sakadzeni ngoba usacabanga ngaso. Kungenteka nekwekutsi bokhokhomkhulu wakho bakuvetela sona lesingani sakho sakadzeni ngobe sikhetswe ngibo kutsi uphilisane naso ingunaphakade.
Imiva Lengakacatululwa
Uma uphupha singani sakho sakadzeni sikushaya nobe sikunika liso lelibi, loku kungasho kutsi sikubambele emagcubu kanye nentfukutselo nobe asikacoli kuloko lokwenteka emkhatsini wenu nobabili. Uma uphupha uwasha timphahla endlini yaso kungasho kutsi kudzingeka uhlale phansi naso ufike uvule sifuba ngetintfo letimbi lenatjelana tona ngesikhatsi niphikisana.
Uma uphupha usekhaya lemndeni laleso singani sakadzeni, loku kungasho kutsi umndeni waso uyakutsandza futsi basakucabanga nobe ningasekho ndzawonye, kungentekafutsi basakhuluma ngawe. Uma usiphupha singcunu embikwakho kungasho kutsi sitawuhlambalateka phambi kwebantfu, nobe sevele sihlambalatekile ngandlela tsite.
Kucabula
Uma uphupha wanga umlingani wakho, kungasho inhlanhla lembi ngoba kungenteka buhlobo bakho buphele madvute. Nangabe kuyindvodza yakho nobe umfati wakho, bangase bakukhohlise. Uma nje kungumuntfu lomuhle, loko kuyinhlanhla futsi kungasho kutsi kunemuntfu lotakusita kutsi uphume enkingeni lobhekene nayo.
Sitsandvwa/Umlingani
Kuphupha ngemlingani/sitsandvwa sakho kungaba luphawu loluhle uma kunekuphikisana lenibhekene nako ngoba kungasho kutsi buhlobo benu butawuba nekuthula, nibumbane futsi nijabule. Kuphupha uphikisana nemlingani wakho, uma vele niphikisana mbamba ekuphileni kwenu, kungasho kutsi nitawuphumelela ekucatululeni tinkinga emkhatsisini wenu nobabili.
Lutsandvo Nekutinikela
Uma uphupha umlingani wakho agcoke timphahla takho, kungasho kutsi uyakutsandza mbamba futsi utinikele kuwe, futsi uma uphupha utama kugcoka timphahla temlingani wakho futsi tikulingana, kungasho kutsi lutsandvo lwakho lutawuchuma futsi lukhule. Uma sitsandvwa sakho sikulahla nobe sikuphika ephusheni kungasho kutsi lutsandvo lwenu lutawucina, futsi nanobe kukhona bantfu labafisa kutsi nihlukane ngeke baphumelele.
Kunakekela Umlingani Wakho
Kupheka kudla lokumnandzi kungasho kutsi unesineke futsi uyakhona kunakekela umlingani wakho nekumenetisa. Uma uphupha uhlanta nobe ushanela indlu yakhe kungasho kutsi uyakhatsateka ngaye nekutsi buhlobo benu ubugadze ngebunono kutsi buhlale bucinile bungabi netinkinga letingaholela ekuhlukaneni kwenu.
Timphawu Tekwecwayisa
Uma wena nemlingani wakho nijabulile ephusheni, kungaba luphawu lolubi lolungasho kutsi kutawuba nesimo lesitawenta kutsi buhlobo benu bubemuncu futsi nihlukane. Uma nilele embhedzeni nitfokotele kuya ecasini kungasho kutsi kukhona lotakuphehla nobe akuloye, kubalulekile kutsi usukume utfole lusito ngobe ningagcina senehlukene.
Uma ulahlekelwa sicatfulo semlingani wakho ungasitfoli, kungasho kutsi utakulahla esikhatsini lesitako. Uma uphupha umlingani wakho adzakiwe kungasho kutsi akasuye lomuntfu locabanga kutsi unguye, nekutsi kukhona bantfu labamholela endleleni lengakalungi futsi uyabavumela.
Kungcubutana Nemlingani
Kuphupha ngekungcubutana nesitsandvwa/umlingani wakho kungasho kutsi utawuba nekuthula ngemuva kwekuphikisana longahle ube nako. Ngalesinye sikhatsi kungaba luphawu lolubi futsi kusho kutsi:
- Utakutfuka/akuhlambalate, nobe asebentise emagama lakwehlisa sitfunti.
- Umoya wabokhokho awukujabuli ngenca yekutiphatsa kwakho. Kufanele ukhuleke kute ugweme tinkinga nemlingani wakho.
- Sitsandvwa sakho sinekutfukutsela lokunyenti lokungenteka sikukhiphele kuwe.