Kubalulekile kutsi uma uneliphupho lelibuya kaningi, kutsi uyakhona kucondza kutsi lisho kutsini. Lelo phupho lingabika kutsi yini lengahle yenteke, futsi kubalulekile kutsi ucondze inchazelo yalo. Imvamisa emaphupho amelela bogogomkhulu labakhulumisana nawe. Kuba nemaphupho lamabi njalo akusiyo intfo lenhle njengoba kukhombisa ingoti. Kunenkholelo yekutsi uma wenta loko emadloti lakutjela kona emaphusheni, utawuba nenhlanhla futsi batawuba khona bogogomkhulu kute bakuvikela tukwe tinsayeya netingcinamba lobhekana nato. Uma sewukwentile lokudzingekako, emaphupho akho kufanele aphindze akhombise kutsi sewubuncobile bumatima bakho.
Emaphupho Ekuncoba Labanye
Uma uphupha ulwa nemlamu wakho nobe akukhomba bungcunu bakhe: loku kungasho kutsi ukufaka butsakatsi lobubi. Kepha uma uphupha umshaya ute umncobe, utawube umncobile kuto tonkhe tento takhe letimbi netinhloso takhe letimbi. Ngetulu kwaloko, butsakatsi lebeketama kubufaka kuwe angeke busasebenta.
Uma umuntfu atsandzana nemlingani wakho emvakwakho bese uphupha akuhlekisa nobe akudlalisa, loku kungasho kutsi usebentisa butsakatsi kuwe nobe wetama kukufaka sichitfo kute lomlingani wakho akushiye atochubeka naye. Kepha uma uphupha ushaya lowo muntfu uze umncobe, utawube sewumncobile kuwo onkhe emacebo akhe lamabi futsi lobo butsakatsi bakhe lebaketama kubufaka kuwe ngeke busasebenta kuwe.
Kulwa neTilwane Temoya
Uma uphupha ulwa nemuntfu lokuncobako, inchazelo iya ngebulili baloyo lolwa naye. Uma ungumuntfu lomdvuna futsi wehlulwa ngumfati nobe ungumfati wehlulwa yindvodza, ungabe ulwa nesilwane semoya, futsi bulili balesilwane buphambene nemuntfu lesitfunyelwe kuye. Kepha uma uphupha kutsi uncoba umuntfu lotsite, loko kuluphawu lolukhomba kutsi sewumncobile loyo muntfu emphilweni.
Labanye bantfu banenhlanhla kutsi bakhone kubona kutsi silwane lesitfunyiwe ngoba siyashintja simo saso, njengekutsi uma usishaya ephusheni bese siyashintja sigucuke sibe ngumntfwana wakho noma sihlobo sakho. Uma uchubeka usishaya bese siphindze siyagucuka sibe silwane. Uma usishaya size sife, kusho kutsi sewuncobile futsi angeke siphindze sikuhluphe. Ungancoba letinhlobo temaphupho ngekusebentisa imitsi yesintfu nobe umkhuleko uma ungumuntfu lokholelwa emkhulekweni.
Kuncoba Bubi Lobuhlobene Netintfo
Uma uphupha kwakhiwa indlu, kungasho tintfo letehlukene. Uma uphupha indlu seyiphelile nobe yakhiwa ngekushesha, loko kungasho kutsi kungenteka kube khona umuntfu loshonako. Kodvwa nangabe uyibhubhisa leyondlu, loku ngeke sekusenteka. Uma utsatsa lithulusi lebelisetjentiselwa kwakha lendlu bese uyayibhidlita lendlu, loku kungasho kutsi uncobe kugula noma intfo lembi lebeyingenteka emndenini wakho noma kuwe.
Uma uphupha tintfo takho tilahlekile ungatitfoli nawutifuna, nobe uma uphucwa intfo lebewuyiphetse esandleni sakho, kungaba ngumlayeto lohlobene nenhlanhla yakho.
Ngalesinye sikhatsi uphupha unemacici lamabili esandleni bese linye liyalahleka. Noma tinkinobho tetimphahla lotigcokile tiyalahleka ungatitfoli. Uma uphupha kutsi ekugcineni utitfolele wena noma kunelivi lelitsi “nati tintfo takho”, kusho kutsi sewuncobile bubi nobe lomuntfu lobekafuna kukutsatsela inhlanhla yakho.
Kuncoba Labo Labakufisela Kulimala nobe Ingoti
Ungaphupha umuntfu akwentela tintfo letimbi nobe agweme kukubuka emehlweni. Kungenteka basendzaweni lemnyama futsi ngalesinye sikhatsi bakhulume nawe bakutjele tintfo letimbi labafuna kukwenta tona nekutsi kungani bafuna kukwentela tona.
Ngalesinye sikhatsi lomuntfu utawube aciniswa ngemitsi yesintfu kanye nebabhuli/tangima letibatjela kutsi bokhokho babo bayabavikela. Kepha loyo muntfu angaveta kutsi tinhlelo tabo atisebenti futsi emandla lavela emitsini yesintfu nakubokhokho babo akasanamandla. Uma loko kwenteka, lowo muntfu angeke asakwenta lutfo njengobe emandla akhe sekaphelile.