Emaphupho mayelana nekugijima avame kuhlukaniswa abe tigaba letimbili, angakhombisa tinsayeya nobe impumelelo. Bona tinchazelo letingephansi:
Imphumelelo kanye Nekuphumelela
Kuphupha ugijima ute ufike lapho uya khona kungakhombisa inhlanhla lenkhulu, kutsi kunemphumelelo letako. Kungasho kutsi emaphupho akho atawugcwaliseka. Uma uphupha ugijima wedvwana emgwacweni locondzile wesikontiyela loku kungasho kutsi uma usebenta ungakhatsali emaphupho akho atawugcwaliseka kalula. Kuphupha ugijima bese uyakhutjwa kepha ugcine ufikile lapho uya khona kungasho kutsi utawuphumelela kepha utawubhekana netinsayeya letinyenti.
Tinsayeya kanye Netihibe
Uma uphupha ugijima kepha ungafiki lapho uya khona, loku kungasho kutsi kudzingeka uhlanjululwe kususa inhlanhla lembi kute uphumelele. Kuphupha ugijima bese uyawa kungasho kutsi intfo lekufanele yenteke angeke iphelele nobe itawuphangise iphele. Kuphupha ugijima endzaweni leneludzaka nobe lemnyama kungasho kutsi kutawuba matima kutsi ufinyelele emphumelelweni.
Uma uphupha ugijima ukhuphuka intsaba loku kungasho kutsi kute uphumelele kufanele ucale ulungise tinkinga letadalwa ngumndeni wakho. Kuphupha ugijima eludzakeni kungasho kutsi kunekungcubutana emkhatsini wemimoya yabokhokho bakho.
Kuphupha ugijima ujikeleta indzawo yinye kungasho kutsi indlela lohlela ngayo kwenta tintfo yindlela lefanele kepha angeke ikufikise lapho ufuna kuya khona.
Kungcubutana kanye Nekuncitisana
Kuphupha ugijinyiswa ngesikhatsi ugijima kungasho kutsi ubhekene netitsa nobe timbangi letifuna tintfo letifanako naleto lotifunako.
Kuphupha ugijima nebantfu, ngalesinye sikhatsi ube semuva kunabo, ngalesinye sikhatsi ube embikwabo, kungasho kutsi kukhona bantfu labaphikisana nawe, labafunga kutsi angeke bancotjwe nguwe.