Kuphupha ngetinwele takho, kungasho tintfo letinyenti letehlukene. Uma ngabe uphupha tinwele takho nje todvwa, ungatfola lutsandvo nobe budlelwane emphilweni yakho kepha lowo muntfu angaphindze atsandze lomunye umuntfu. Ngesintfu kuphupha tinwele kungasho emandla akho ekufinyelela emphumelelweni yelikusasa lakho.
Kushintjashintja kweTinwele
Kuphupha ukama tinwele takho, kungasho kutsi utawulahlekelwa yintfo lebalulekile, kantsi kushintja nobe kupenda umbala wetinwele takho kungasho kutsi kunetinkinga lotawudibana nato endleni yakho yekuphila.
Uma uphupha utjutjwa tinwele takho kungasho kulahlekelwa noma kutsatselwa emandla emtimba nengcondvo. Kubalulekile kutsi wati kutsi ngubani lokujuba tinwele takho nekutsi ukuphi, ngoba kulahleka kwemandla kutawube kuhlobene nalowo muntfu nendzawo. Kutjutjwa kwetinwele ephusheni kungaphindze kusho kwendlula esimeni saphambilini lebesinemtselela wekulimata ingcondvo nemphefemulo wakho, kepha nyalo sewuyaphola uyagucuka uba ngumuntfu lokhulile lomusha.
Budze Betinwele kanye Nembala
Nangabe tinwele takho setikhule taba tindze kakhulu ephusheni, kungasho kutsi utawuphila imphilo lendze lenemphumelelo. Kepha uma umbala wato ubovu, kufanele ucaphele titsa letingaba khona empilweni yakho.Lesinye sikhatsi natibovu tigcotjiswe ngelibovu kusho bokhokho bakini labakhona nobe labakukhombisa kutsi kutawufika sigaba emphilweni yakho lapho kufanele kutsi utfwase ube ngumelaphi wesintfu; bunyanga.
Kucotfuka/Kujubeka KweTinwele
Kuphupha ucotfukelwa tinwele takho, kusho kutsi ukhatsatekile ngoba kunebantfu labakutsakatsako emphilweni yakho nobe simo semphilo yakho sibucayi, sewute emandla ekuchubekela phambili ngemphilo.
Nangabe unemphandla, kungasho umcebo nemphilo kumadvodza, nebuphuya nekugula kubantfu besifazane nobe kubhubha kwalotsite emndenini.
Uma singani sakho lesidvuna sinemphandla ephusheni lakho kepha site mbamba emphileni, kungasho kutsi buhlobo bakho abukahlelelwa kutsi bube njalo, futsi bungahle bube senkingeni bushabalale.