Skip to content
- Ukutlhoga sakho kubhiqa ngamanzi: Nawunganazinto ekungezakho uzotlhaga, kuhle ukuba nezinto ekungezakho ukuze ungazitholi utlhaga. Nawunganazinto ekungezakho uzotlhaga uzithole uboleka ngamalanga ungena uyaphuma ebantwini uyaboleka abanye bakudime nokukudima ngombana sele ubawe khulu kibo.
- Kubethwa edosako: Umuntu ozisikimelako izinto afuna ukuzenza urhona ukuzijamela kunanyana yini ahlangabezana nayo begodu nesekelo ulithola lula. Umuntu osikimela yokinto ayenzako uvamise ukuphumelela lula ngombana nakazisikimelako laba ebambonako bona ufuna ukenzani bayamsiza lapho barhona khona ngombana bafuna nabo aphumelele.
- Kuvuswa ezivusako: Kusizwa umuntu ozenzelako esikhathini esinengi ngombana woke umuntu uyabona bonyana ufuna ukuzijamela abenezinto ekungezakhe begodu urhuluphele entweni ayenzako, lokho kukhuthaza nabantu ebaseduze naye bona bamsize aphumelele entweni afuna ukuyenza le. Umuntu onesifiso sokuphumelela uyazenzela akhombise laba ebangamsiza bona unetjisakalo ngento afuna ukuyenza le.
- Kubamba ezumako: Umuntu nakafuna izinto zakhe ziphumelele nofana zikhambe kuhle kufanele azisikimele azenzele yena ngokwakhe. Izinto nawuzenza wena ziba yinto ofuna zibengiyo begodu kuba ngendlela ofise bona zibe ngayo kodwana wathembela ebantwini ungadana ngoba bangahlala bangazenzi nofana bazenze ngendlela efuniwa ngibo ingasi ngile efuniwa nguwe.
- Ayikho ikomo yobuthongo: Umuntu nakafuna izinto zakhe zenzeke kufanele azenzele. Nawufuna izinto zakho zenzeke kuhle nangendlelako kufanele ungalali kodwana uvuke uzenzele yokinto angazenzela yona ibe yipumelelo nokuba yihle ibeyihle. Umuntu ohlala allele izinto zakhe aziphumeleli ngombana abantu nabenza izinto bafuna ukuzijamela yena ulele.
- Ayikho ikwali ephandela enye: Umuntu nakafuna ukuzijamela kufanele azenzele izinto zakhe angalindi abantu ukuthi bamenzele nofana bamusize. Umuntu nomuntu izinto zakhe uyazisebenzela begodu ukuthi ziphumelele zenziwa mnikazi wazo ingasi omunye umuntu.
- Ingwe idla ngamabalayo: Umuntu udla ngamandlakhe, yokinto ofuna ibe ngeyakho kufanele uyisebenzele ukuze uyithole. Umuntu ongazenzeliko akabinalitho, ngaphandle kokuthi uzenzele angekhe waba nelitho ekuba ngelakho ngombana umuntu nomuntu into afuna kube ngeyakhe uyayisebenzela.
- Eyomileko iyaziyela emthonjeni: Umuntu ofuna ukuzijamela nofana ofuna into yenzeke uyazisikimela. Yokinto ofuna bona yenzeke angekhe yenzeka ngaphandle kokuthi wena uzisikimele uyenze ngoba nawungahlala ungasikimi uyenze akunamuntu ozokwenzela yona izohlala isifiso sokuthi ufisa ukwenza into ethize kodwana ingoma ibhale enyaweni njalo.
- Imbila yatlhoga umsila ngokulayezela: Umuntu nakafuna ukuphumelela izinto zakhe uyazenzela akathumeli abantu ukuthi bamenzele ngombana omunye nomunye umuntu wenza izinto afuna ukuzenza. Yokinto ofuna ibe yipumelelo kufanele uyisikimele uzenzele yona ngobungawe.
Related
