Skip to content
- Ipande igotjwa isesemanzi: Umntwana ufundiswa asesemncani, nawufuna umntwana akhule kuhle kufanele umfundise yokinto ehle ekukhuleni kwakhe ngombana nasele akhulile angekhe asafundiseka uzabe afana nomuntu onganamthetho nofana ongakafundiseki.
- Ayikho indlovu ediselwa mboko wayo: Umuntu angeze ahlulwa bantwana bakhe ngombana nguye obaziko njengombelethi wabo nanyana kunjani umuntu owazi abantwana bakhe mbelethi. Yoke into eyenzeka kibo nofana eyenziwa ngibo umbelethi uyayibona nofana uyayazi.
- Ikukhu ifukamela wayo amaqanda: Omunye nomunye umbelethi ukhulisa begodu utjheja bakhe abantwana, akekho oqala abantwana bomunye umuntu ngombana waqala abantwana babanye uzoliba ukuqala bakho bese kubanezinto ongasazenziko ebantwaneni bakho ulibele kukhuluma nofana kugada bona abanye benzani.
- Intandani ehle ngumakhothwa ngunina: Umntwana okhuliswe babelethi bakhe ukhula kamnandi begodu ukhula kuhle. Umntwana okhuliswa babelethi bakhe benza ngamandlabo woke bona athole yokinto ekufanele ayithole begodu akusilula bona atlhoge ngombana ababelethi bakhe bakhona begodu bayamutjheja mahlangothi woke, benza isiqiniseko sokuthi umntwanabo angatlhogi litho. Umntwana okhuliswa babelethi akunanto emphundako ngombana uyibawa ebabelethini bese bamtholela yona nofana bamenzele yona.
- Indlela ibuzwa kwabaphambli: Umuntu nakafuna ukukhula kuhle begodu afunde yokinto kuhle ubuza abantu abadala ukuze bamuphe iinluleko bamvule namehlo endleleni azoyikhamba ekukhuleni kwakhe. Ukubuza ebantwini abadala kuyinto ezokusiza phambili ngombana uzabe sewunamano wokuthi umuntu omdala wadlula njani nakaqalene nesimo leso ekukhuleni kwakhe, kungakho kubalulekile abantu abadala nabakuvula amehlo ukuthi izinto ebakupha zona ungazingabazi kodwana uzithathele phezulu.
- Ukubeletha kuzithabulula amathambo: Umuntu nakabelethako uzandisela itjhudu lokuthi aphile kamnandi ngombana abantwana abakhulisako bazomsiza ngelinye ilanga nasele atlhoga isizo labo. Ukukhulisa abantwana bakho kuba yinto ehle nasele umdala ngombana njengoba ubasizile ekukhuleni nabo bazokusiza.
- Inyokana ifuze inyoka: Umntwana izinto azenzako ngilezi akhuliswe ngazo, indlela umuntu aziphatha ngayo kuyindlela akhuliswe ngayo. Izinto ezinengi ezenziwa bantwana kuyindlela ekuphilwa ngayo ekhaya ebakhulele kilo, ngombana umntwana ipilo uyiphila ngendlela abona bakwabo baphila ngayo. Kungakho inyoka ingekhe yahluka kunina ngombana ifuza ngazo zoke izinto ezenziwa babelethi.
- Ikghuru ayililahli iqephe: Umuntu indlela afundiswa yona akayilahli. Umuntu ipilo ayiphilako iveza koke akufundiswa kwabo ngoba ifundiso yakwenu kuyipilo yakho oyiphila Malanga woke ekukhuleni kwakho. Umntwana yokinto ayifundiswa babelethi bakhe iba liqephe kuye ngoba kubayinto angayilahliko bekayoba mdala.
- Ithole lengwe libhodla nabonina: Umntwana ukuthi ipilo iragwa njani ufundiswa babelethi bakhe. Umntwana nomntwana ukhuliswa ngemithetho ethile ayithole ebabelethini bakhe imithetho etholwa bantwana bomuntu munye iyafana kodwana abantwana bemzini ehlukileko angekhe bakhuliswa ngokufanako. Kungakho ingwe ibhodla nabonina, ingwe ukuthi kubhodlwa njani ifundiswa babelethi bayo, yokinto eyenzako ifundiswa ngezidala.
- Ikunzi isematholeni: Abantwana ebakhuliswa namhlanhle kubabusi bakusasa. Angaba mntwana namhlanje kodwana kusasa abemdosi phambili begodu akudose phambili njengoba umkhulisile nje. Umntwana uyarhona ukumkhulisa namhlanje kuthi ngemva kweminyaka ethize abengehla kunawe ngeskhundla lokho kukhombisa bona umuntu uyakhula.
- Umfundisi akambelethi umfundisi: Umuntu olungileko akukavami bona abelethe umntwana ofana naye kodwana esikhathini esinengi ubeletha umntwana okhamba eqadi kwezinto azenzako yena.
Related
