Amabhudango aveza ukuzithwala komuntu:
- Nangabe ubhudanga iinthelo ezinengi, kungatjho ukuthi isihlobo sakho nofana umnganakho uzithwele.
- Nangabe ubhudanga udla isithelo nguwe ongazithwala nofana ozithweleko.
- Nangabe ubhudanga ududa emanzini asilaphazekileko nofana anomdzwele begodu uyaminza, kungatjho ukuthi uzithwele.
- Nangabe ubhudanga uzithwele, kungatjho ukuthi uzokuba namawele ngelinye ilanga khulu khulu nangabe liyabuya ibhudangweli. Kwesinye isikhathi lingatjho ukuthi kunefihlo ekhona ezokuvela.
Abanye abantu bayakghona ukuzibhudangela bona ukuthi bazithwele kodwana kuvame ukuthi kube ngomunye umuntu okubhudangelako.
Iimbusiso zabeZimu neembopho
Kunebhudango leli la uthi ubhudanga khona uzithwele begodu woke umuntu azi, nofana umuntu omkhulu emndenini angabhudanga ubulili bomntwana. Kunekolo yokuthi ibhudangwelo litjho bona umntwana loyo sibusiso sabeZimu kodwana umraro uza lokha umntwana nase abelethiwe athoma ukugula. Khulu khulu nakungakahlawulwa umuzi kwenziwe namasiko-pilo ekufanele enziwe. Umntwana loya angarholophala begodu wena njengombelethi, umntwana nakaqeda ukubelethwa kufanele uthokoze abeZimu ngombana uphawula umnotho. Nangabe umntwana uyokubonwa kunezinto ekufanele zenziwe ngaphamb’ kokuthi abonwe njengokuvubela utjwala nokupheka inyama yangaphakathi kwesilwana ngaphamb’ kokuthi umntwana abonwe.
Kunamabhudango esiwaziko bona nawuba nawo kunezinto ezithileko ekufanele uzenze ukuze ubalekele izinto ezimbi ezingenzeka. Kodwana amabhudango ngokufa nokuzithwala akukghonakali ukuthi ungabalekela into eyenzekileko, ye-ke kuqakathekile bona ukhumbule into oyibhudangileko ebusuku ngombana lokhu kungaba lisizo.
Ukubhudanga ngokuzithwala kwabanye abantu
Ukubhudanga omunye umuntu azithwele liphawu lokuthi kunento nofana izinto ekungezakho ngokomthetho kodwana zisezandleni zomunye umuntu kodwana kugasikade izintwezo zizokubuya ezandleni zomnikazi. Kungaba yinto elilifa, otjhiyelwe yona nofana into eyakulahlekela esikhathini esidlulileko njengesikhundla somsebenzi esanikelwa omunye umuntu ngendlela engakafaneli engavela kungasikade bese kubuyele kuwe.