Kuqakathekile bona nangabe ubhudanga kanengi, ukwazi ukuzwisisa bona litjho ukuthini. Ibhudangwelo lingabika bona khuyini engenzeka, begodu kuqakathekile bona uzwisise ihlathululo yalo. Ngokuvamileko amabhudango ajamele abeZimu abakhulumisana nawe. Ukuba namabhudngo amambi mihla namalanga akusiyinto ehle ngombana lingaphawula ubungozi. Kunekolo yokuthi nangabe wenza lokhu abeZimu abakutjela khona emabhudangweni unganotha begodu bazokuvikela eentjhijilweni. Wase wenza lokhu ekufanele bona ukwenze, namabhudangwakho azokutjengisa bona uhlule ubudisi.
Amabhudango ngokuhlula abanye
Ukubhudanga ulwa nosibari sakho nofana akukhumbisa iindunu zakhe: kungatjho ukuthi ukufake umlingo kodwana nawubhudanga ukuthi uyamubetha bewumhlule kutjho bona umhlulile entweni embi ebekathi uyenza kuwe. Phezu kwalokho, umlingo lo akusebenzisela wona angekhe usasebenza.
Nangabe umuntu ujola nomlinganakho bese umubhudanga akurhuga kutjho bona ukufake umlingo kodwana nangabe lapho ebhudangweni uyamuhlula, kutjho bona vele umuhlulile ebumbini bakhe ebegade akwenza kuwe begodu nomlingo loyo angeze usasebenza.
Ukulwa neenlwana zoMoya
Nangabe ubhudanga ulwa nomuntu okuhlulako, ihlathululo yakhona iya ngobulili bomuntu olwa naye loyo. Nangabe umfazi ubhudanga ulwa nendoda nofana uyindoda ubhudanga ulwa nomfazi kutjho bona ulwa nesilwana begodu ubulili besilwana leso buphambene nobulili bomuntu osithumileko kodwana nawubhudanga uhlula umuntu usuke sewumuhlulile nepilweni mbala.
Abanye abantu banetjhudu lokubona isilwana ngombana siyatjhuguluka njengokuthi nawusibethako ebhudangweni siyatjhuguluka sibe mntwanakho nofana sibe sihlobo sakho. Nangabe usibetha besife kutjho bona usihlulile begodu angekhe sisakutshwenya. Ungasusa izintwezi ngokusebenzisa iinhlahla zesintu nofana umthandazo nangabe umumuntu okholelwa emthandazweni.
Ukuhlula ubumbi obuhlobene nezinto
Nangabe ubhudanga indlu yakhiwa, kungatjho izinto ezinengi. Nangabe ubhudanga indlu iqediwe nofana iyakhiwa msinyana, lokho kungatjho bona umuntu angabhubha. Kodwana nawuyibhirizako, lokhu angeze kusenzeka. Nawuthatha ithulusi ebelisetjenziselwa ukwakha indlu bese ubhiriza indlu: lokho kungatjho bona uhlule ukugula nofana into embi ebegade yenzeka emndeninakho nofana kuwe.
Nawubhudanga uthi izinto zakho zilahlekile begodu awukghoni ukuzithola lokha nawuzifunako, nofana nawumukwa into ebewuyiphethe ngesandla sakho, kungaba mlayezo ophathelene netjhudu.
Kwesinye isikhathi ubhudanga unamacici amabili esandleni sakho bese elinye lawo lilahleke nofana amakunupe wezembatho ozimbetheko alahleka begodu awukghoni ukuwathola. Nawubhudanga ekugcineni uzifumana wena namkha kube nephimbo elithi “nanzi izinto zakho”, kutjho bona uhlule ubumbi namkha umuntu obekafuna ukuthatha itjhudu lakho.
Ukuhlula laba abakufisela ukulimala
Ungabhudanga ngomuntu enza izinto ezimbi kuwe nofana abaleka ukuqalana nawe ngemehlweni. Kungenzeka basendaweni emnyama begodu kwesinye isikhathi bakhuluma nawe bakutjele izinto ezimbi abafuna ukukwenza zona nokuthi kubayini bafuna ukwenza njalo.
Kwesinye isikhathi umuntu lo uzobe aqiniswe ngeenhlahla zesintu begodu ababhuli/ izangoma ezibatjela bona abokhokho babo bayabavikela. Kodwana umuntu lo angaveza bona amahlelo wakhe awasebenzi begodu amandla avela eenhlahleni zesintu nabokhokho bakhe ayaphela. Nasele lokho kwenzekile, umuntu loyo angeze asenza litho kuwe ngombana amandla wakhe sele aphelile.