Amabhudango atjengisa bona usidisi:
- Nangabe ubhudanga iinthelo ezinengi ezahlukahlukeneko, kungatjho ukuthi isihlobo nofana umnganakho usidisi.
- Nangabe ubhudanga udla iinthelo, kungenzeka bona nguwe ongaba sidisi nofana sele sewusididi.
- Nangabe ubhudanga ududa emanzini asilaphazekileko nofana anom’dzwele begodu uyaqwila ungaba sidisi.
- Nangabe ubhudanga usidisi, kungatjho ukuthi ikhona ifihlo ekhona ezokuvela.
Abanye abantu bayakghona ukuzibhudangela bona ukuthi basidisi kodwana ngenjwayelo kuba mumuntu omunye okubhudangelako.
Kunebhudango lapho uthola bona usidisi begodu woke umuntu uyazi, umbonakulu emndenini abhudange ubulili bomntwana. Kune Kolo yokuthi lokho kutjho bona umntwana loyo usibusiso esivela ebeZimini. Nokho, umraro ubakhona umntwana angabelethwa bese agule. Khulu khulu lokha nangabe ‘abakahlawuli’ ekhabo leSokana nofana umntwana akusimntwana weenkomo. Umntwana loyo angarholophala. Begodu wena, njengombelethi, umntwana nakasele abelethiwe kufanele nithokoze umntwana ngombana ujamele itjhudu. Nangabe umntwana uzokubonwa babanye abantu, kunezinto ezithileko ekufanele zenziwe kokuthoma, njengokuthi umntwana uhlala nonina ngendlini iinyanga ezintathu ngaphamb’ kokuthi aphumele ngaphandle, uthi angaphumela ngaphandle agudwe iinhluthu zehloko bese nakunomuntu ozako azombona, uza aphethe isipho njengesibha netjhila lokuhlamba.
Kunamabhudango esiwaziko ukuthi nawuba nawo kunezinto ezithile ekufanele uzenze ukuze uvike bona izinto ezimbi zingenzeki. Nokho, amabhudango angokufa nokuba sidisi akukghonakali bona ukuvike lokho esele kwenzekile. Kodwana kuqakathekile bona ukhumbule bona ubhudange ini ngob’sukobo ngombana lokho kungakusiza.
Ukubhudanga ngomunye umuntu asididi
Ukubhudanga ngomunye umuntu asidisi liphawu lokuthi kunento nofana izinto ekungezakho ngokomthetho kodwana zisezandleni zomunye umuntu. Nokho, kungasikade izintwezo zizokufika ezandleni ezifaneleko. Kungaba sikhundla somsebenzi esinikelwe omunye umuntu ngendlela engakafaneli ezokuvela, bese kubuye kuwe.