Ukubhudanga ngebhadi kuvamise kungahlongi ihlathululo nofana ukuhlaziyiwa ngombana amabhudango layo anqophile, okwenzeka ebhudangweni ngikho okungenzeka. Kodwana abeZimu bakho bayakukhombisa okuhle nokumbi okungenzeka nofana okuzokwenzeka ngamabhudango ebusuku. Amabhudango aqakathekile, ungawalibali nawuvukako begodu yazi ukuwahlathulula. Nangabe awukwazi ukuwahlathulula, buza aboMbonakulu ngombana kungenzeka bona kunento otjelwa yona beZimu.
- Nangabe ubhudanga usendaweni emnyama, kungaba libhadi nangabe awukghoni ukuphuma kiyo. Nangabe uba nebhudangweli kanengi begodu umumuntu ophila isintu, kuqakathekile bona uyokubona uSiyazi noma uMelaphi wendabuko. Uyaboniswa bona ubujamo bumakhaza begodu izinto azikhambi kuhle. Amabhadi angabangwa mumuntu omthakathi ongafuni ukuthi ube nezinto ezihle epilwenakho nofana abangwe yindlela ophila ngayo, lapha ukhamba khona nokhunye okwenzako okuphikisana nemvelo. Nanoma ungenza izinto ezingakuphumelelisa, akukho okusebenzako. Amakholwa angathandaza bebaphumelele.
- Ungabhudanga ududa emanzini asilaphazekileko, bese ubone umntwana obulanzi begodu uzame ukumubamba kodwana ubhalelwe, uzithole sewusendaweni emnyama. Ibhudangweli livame ukuvelela abomma ababuya endleleni. Umntwana osebhudangweni ngilo owabhubhako. Umntwana loyo ukukhombisa ukuthi sekakhulile begodu kunezinto ezithile ekufanele enzelwe zona. Ngokwetjhudu, ibhudangweli lisana epumelelweni, nangabe yoke into ekufanele yenzeke iyalandelwa bese yenzeke. Umma loyo angagezwa. Iinhlahla zikhona kibo aboMelaphi bendabuko. Okuqakathekileko kukuthi isikopilo lokugezwa lenziwe, umntwana loyo athiyiwe negama. Nange umuntu loyo ulandela koke ngefanelo, izinto ezihle zingaphuma kilokhu.
- Nangabe ubhudanga umuntu obulanzi akulandelela, noma uyamazi nofana awumazi, lokhu kungatjho bona uzokuba nebhadi nobuthakathi obuza phez’ kwakho. Kwesinye isikhathi kuyenzeka bona umuntu omaziko kube nguye okuthakathako.
- Nangabe ubhudanga udlelezelwa imali ngomunye umuntu noma ubhudanga kunento ophiwa yona bese kube nomuntu oyebako: lokhu kungatjho ibhadi. Kungenzeka bona kunesipho onikelwe sona noma esizako odlelezelwe sona. Nofana kungatjho ukuthi kunomuntu othethe itjhudu lakho walenza lakhe. Kuvamise ukuba lilunga lomndeni ngombana umuntu ongakwaziko akazi abeZimu bakho. Yeke, umuntu ongamaziko nakenza into, ingahlala ingasebenzi kuhle ngombana abeZimu bakho ngibo abaziko bona itjhudu lakho baliletha njani kuwe. Yeke, nakulilunga lomndeni kuyenzeka ngombana uyakwazi ukukhuluma nabeZimu laba okhuluma nabo. Ungakulungisa lokhu kodwana umenzibumbi uzokubuya ngamandla ngombana umumuntu oduze nawe begodu nabelana abeZimu, okutjho ukuthi bayakghona ukukubona nawuphendulako. Ngokuya kwesikhathi, uzokubona lokhu ebewukubhudanga kwenzeka kilo ilunga lomndenelo, okuliphawu bona ngilo elikulimazako.
- Nangabe ubhudanga umuntu akunikela izembatho ezidala noma akwenza bona umhlwengisele izembatho zakhe ezisilaphazekileko, bese amanzi ohlamba ngawo asilaphazekile begodu basunduza izembatho ezisilaphazekileko kuwe, lokhu kungatjho ibhadi begodu ukhona umuntu oletha ibhadi kwenu. Kwesinye isikhathi, ubhudanga unikelwa ihlamvu yemali emnyama noma uwathole nawukhambako. Ihlamvu yemali emnyama ingatjho ibhadi begodu ezinye izinto angekhe zikhambe kuhle epilwenakho. Nofana uyatjengiswa bona kunezinto ezingakhambi kuhle epilwenakho. Nangabe kunomuntu okulethela ingubo emnyama, kungaba liphawu lebhadi, lo okunikela yona kungaba nguye owehlelwa libhadi.
- Ukubhudanga ibhoksi lesidumbu kungabika bona kunegulo emndenini.