Bele ḽa mambo nṱangi wa kugara,
Goko musika vhathu, Dzata wo bva nga dza Mapfene,
U kungulusa tombo ndi u ḽi isa vhudzuloni,
Tshifhinga tsha Dzata tsho ḓi sendeka ngauri tambani nga u kona vhatshana,
Lwanga lutsinga ndi a ḓiakhela,
Vhe ndi Singo ḽa masingo,
Kha muṋe wawe ene Thohoyandou o mbo swa ḽa bele vhunga o vha a tshi dzulela u vunḓa milenzhe ya phele dza muṋe wawe,
Zwo tou pfi phele i fhedzaho phele dza musanda,
Ḓuhulu ḽa Belemambo ene Mphwambobvu wa mphwa vhulungu vhutete ha Denga,
Vhu no lunzhedzwa nga a na nzhele, a sina nzhele u a fhaladza,
Ndi Ravele ene wa ha Ravele matsheketsheke,
Wa banga ḽa mutshea hoṱhe,
We a ḽa mbidzi a dzima vhalanda,
A ri: “Hetshi ndi tshivhindi tsha vhakololo,
Vhoiṋwi ndi ḓo ni ṱhavhela kholomo buka ḽi re na mutsindo”,
Ḽawe o mbo ḓi pfi ḽi pfi Mauluma,
Vhe vha tshi renda Mauluma vha ri: “A ḽina thavha”, thavha dzavho ndi vhatukana,
Ravele mupfufhi milenzhe, mahada u a dudumela,
Wa maunavhathu vha no pembela khoroni vho ṱoma khoroni ṱhoho ya swina kha pfumo, ngeno vha tshi ḽioba ngoma nga tshanda tsha muthu,
Ene wa ha Muofhe wa u ofha ndala a sa ofhi pfumo, pfumo u laṱa nga eṱhe,
Vhe Ngilimane Tshitoponi, kutamani yo sia mutshinyalo,
Ndi muthannga wa musanda a sa shavhi mpengo,
Ndi ngoho ndi malofha a khemba a tevhuwa aya khetha,
Ndo tenda vhe miṱodzi ya munna a lilaho o ima mbvulani i ḓivhiwa nga muṋe wayo,
Ndi Nwamuofhe Ravele Matsheketsheke Bele ḽa mambo.
