Rambau-Mutavhatsindi muila-mutshila wa mbudzi,
Ngeno mutumbu a tshi ḽa; Mutavhatsindi,
Wone muri mufunwa nga vhasadzi,
Vhatavhatsindi, vhatavhi-vha-tsindi,
Rambau-Mutavhatsindi wa tshituni tsha Dembe,
Wa khosi ya ngome; musi tanga i tshi hwaliwa na hatsi,
Musi ṅwana a tshi bebwa a vhidzwa Dembe,
Mme a vhidzwa Nyadembe,
Musi ri tshi ḓi renda ri ri: “Tshituni tsha vhatukana na vhasidzana”,
Dzulani zwaṋu Singo, Kwinda, Nemagovhani, Netshifadi, Netshikweta,
Ra dovha ra ri: “Dembe musiki washu”,
Dzulani zwaṋu Singo-Rambau; muthu wa Dzivha, ngoma ḽa vho-Tshikala,
Tshikala wa mulenzhe vuluvulu ḽo luma ṱhoho,
Ndi Tshituni tsha khosi Mapfumo na Dembe,
Dembe washu muḽila-vhathu; u vha ḽila u ḓo vha fha ni?
Mapila o pila vhathu, o pila zwivhi na zwivhuya,
Tshithotholwe tsha vho-Nndwana,
Thavha yashu ri khoda Nngweni ho edelaho vhahali vhukuma.
